Policia në Pejë po bënë fushatë mobilizuese në zbatimin e masave ‘Anti COVID-19’, para se t’i gjobisë qytetarët

Në vazhdën e angazhimeve policore në zbatim të planit operativ, Drejtoria Rajonale e Policisë në Pejë, ka vijuar me zbatimin e masave anti-Covid 19, gjithnjë në përputhje me vendimet e institucioneve shtetërore për parandalim të përhapjes së pandemisë, thuhet në një njoftim të Policisë së Kosovës.

“Angazhimet policore janë ndërmarrë në bashkërendim me mekanizmat tjerë ndër institucional, ku i gjithë angazhimi ka reflektuar si masë parandalimi dhe ngritje e nivelit të respektimit të masave”, ka bërë të ditur policia.

Policia në vazhdimësi ka apeluar dhe apelon tek të gjithë qytetarët që t’i zbatojnë masat që janë në fuqi, në mënyrë që të kemi sa me pak të prekur, përndryshe policia është e vendosur të zbatojnë ligjin, përfshirë edhe gjobat si masë e fundit.