Policia për arrestimin në Vushtrri: “Kishte refuzuar të vendoste maskën dhe refuzoi të ua jep letërnjoftimin zyrtarëve policor ”

Policia e Kosovës ka dal me një njoftim në lidhje me arrestimin e një të moshuarit në qytetin e Vushtrrisë.

Në videon që ka publikuar Indeksonline shihet se si Policia arreston një person në qytet dhe i arrestuari ankohet se po i dhemb dora.

Policia e Kosovës në sqarimin e bërë tregon se i arrestuari kishte refuzuar të barte maskën përkundër që i ishte kërkuar dhe se kishte refuzuar të jepte letërnjoftimin.

Komunikata e plotë e Policisë së Kosovës:

NJOFTIM PËR MEDIA

Prishtinë,  10 shtator 2021

Policia e Kosovës, me qëllim informimin e drejtë të opinionit publik lidhur me shkrimet dhe videot të cilat janë publikuar sot (10.09.2021) në disa media-portale, e që i referohen kinse një rasti të konfrontimit të një personi të moshuar me zyrtarët policorë në Vushtrri, ju informon dhe njëherit sqaron me sa vijon:

Policia e Kosovës si institucion i zbatimit të ligjit në të gjitha rastet ndërmerr veprimet konform procedurave dhe autorizimeve ligjore, përfshirë vlerësimet dhe rrethanat e krijuara në terren.

Në këtë rast, derisa  njësia e hetimeve Regjionale-Mitrovicë kishte qenë duke patrulluar në bulevardin “Adem Jashari “ në Vushtrri në zbatim të planit  operativ Covid -19, kishte hasur  në një person i cili nuk e kishte pasur  të vendosur  maskën mbrojtëse dhe nga i njëjti  kanë kërkuar që  ta vendos maskën mbrojtëse bazuar në vendimin për masat mbrojtëse nga pandemia.

Personi në fjalë fillimisht kishte refuzuar vendosjen e maskës, e po ashtu kishte refuzuar edhe prezantimin e dokumentit identifikues (letërnjoftimin) të kërkuar nga zyrtarët policorë.

Vlen të potencohet se zyrtarët policorë kishin kërkuar dhe njëherit i kishin dhënë urdhër verbal disa  herë personit në fjalë, por i njëjti duke refuzuar nuk i ishte bindur urdhrave të zyrtareve policorë duke aluduar se është i sëmurë, por pa argumentuar me ndonjë dokument mjekësor.

Zyrtarët policorë janë detyruar të ndërmarrin veprime ligjore duke e vënë nën  kontroll personin, të cilin pastaj e kanë dërguar në stacionin policor për intervistim dhe procedura të mëtejme.

Bazuar në informatat zyrtare nga Drejtoria Rajonale e Mitrovicës, personi në fjalë nuk ka dëshmuar asnjë dokument se është i sëmurë dhe nga verifikimet e bëra i njëjti ka rezultuar se është i njohur për shumë vepra penale.

Në konsultim me gjyqtarin ndaj të njëjtit është iniciuar rasti “Mosrespektim  i urdhrit të policit (PRQP)”,  ku pas intervistimit  rasti vazhdon  procedurë të rregullt, për trajtim të mëtejme nga gjykata kompetente.

Policia e Kosovës, pas çdo operacioni apo veprimi policor, vlerëson dhe njëherit si në këtë rast trajton veprimet dhe sjelljet e zyrtarëve policorë se a janë në harmoni me rregullat dhe procedurat policore.

/Indeksonline/