Policia shqiptare prezanton “Brandin”, qenin që sipas tyre zbuloi disa persona të gjallë nën rrënoja
Polica Shqiptare sapo ka prezantuar qenin e stërvitur për kërkime, “Brandin”.
Sipas njoftimit të Policisë, ky qen ka zbuluar disa persona të gjallë nën rrënoja.
“‘Brandi’ – Heroi me 4 putra i Policisë zbuloi personat e gjallë nën rrënojat e 6-katëshit në Durrës.
‘Brandi’ është heroi me 4 putra i Policisë së Shtetit, të cilin qytetarët e panë përmes ekraneve që transmetonin live nga vendngjarja, ku kërkonte për persona të mbetur nën rrënojat e pallatit 6-katësh në Durrës, goditur nga tërmeti.
Pasditen e 26 nëntorit, teksa u ndërprenë punimet me mjetet rënda dhe u fikën mjetet që punonin nën rrënoja, u përgatit dhe u fut në kërkim qeni policor. Pas kërkimit në pjesën perëndimore të banesës, ku nuk pati asnjë shenjë, u kalua në pjesën jugore të objektit.
‘Brandi’ u fut në një tunel, rreth 4-5 metra, i krijuar nga rrëzimi i objektit. Në këtë vend ka ardhur reagimi i qenit, i cili dha shenjë për praninë e njerëzve nën rrënoja, rreth 2 metra në thellësi.
Ky nuk ishte misioni i parë i ‘Brandit’, pasi ai është përdorur për kërkimin e njerëzve të gjallë nën rrënoja edhe në shërbime të tjera më herët në Shkodër e Tiranë” thuhet në njoftimin e Policisë./Indeksonline/