Politikanët serbë në Kosovë: Lista Serbe vazhdon kërcënimet e shantazhet

Politikanët serbë në Kosovë që nuk janë pjesë e Listës Serbe, vlerësojnë se po zhvillohet një fushatë e egër e me shantazhe ndaj personave që i përkrahin këto parti për zgjedhjet e 6 tetorit.

Sipas tyre, Lista Serbe po vazhdon metodën e vitit 2017, me presione e kërcënime edhe gjatë kësaj fushate. Për këto, krerët e këtyre partive kanë folur në një debat për zgjedhjet parlamentare 2019 të organizuara nga Fondacioni Kosovar për Shoqëri të Hapur, tryezë kjo në të cilën nuk mori pjesë Lista Serbe.

Ani pse i ftuar të paraqesë prioritet qeverisëse për zgjedhjet e jashtëzakonshme të 6 tetorit, Nenad Rashiq, kandidat për kryeministër nga koalicionit “Slobota”, e shfrytëzojë debatin e sotëm të flas më shumë për ato që ai i quajti shantazhe e kërcënime që po u bëhen serbëve nga Lista Serbe.

Rashiqi tha se në javët e fundit të parafushatës zgjedhore, tashmë fushatë zyrtare, po punojnë nën presion.

Sipas tij, presioni veç po rritet duke u bërë më agresiv dhe brutal.

Rashiq tha se si pasojë e kërcënime të tilla, punëtorë shëndetësorë janë larguar nga puna.

“Kjo është që nga vet fillimi i kësaj krijese në vitin 2013, që ka funksionuar në të gjitha proceset zgjedhore, kjo vazhdon edhe sot e kësaj dite edhe më fortë, në mënyrë më agresive. Të gjithë bashkëpunëtorët e mi duhet të jenë të sigurt, të jenë të gjithë shëndoshë e mirë mos t’u ndodh asgjë e keqe, rezultatet e zgjedhjeve janë në rendin e dytë, sepse në radhë të parë vjen siguria për të  gjithë. Kur flasim për programin zgjedhor, do t’i theksoj tre shtylla më të rëndësishme: shtylla e parë veprim ose përforcim i korpusit të serbëve në institucionet e Kosovës në mënyrën që jo vetëm të iniciohet dialogu por atë dialog të nxisim brenda institucioneve të Kosovës dhe do të ketë epilogun e pajtimit mes dy popujve. Kjo është gjëja më e rëndësishme që me keqardhje unë nuk e kam parë në shtatë vitet e fundit që dikush ka punuar në këtë mënyrë për këtë çështje, por kanë punuar në tà « kundërtën. Prej kur është Lista Serbe me partitë tjera politike kemi një dezintegrim total të serbëve në institucionet e Kosovës”, tha ai.

Duke folur për programin, ai tha se e kanë prioritet zhvillimin ekonomik dhe synojnë të subvencionojnë ndërmarrje në mënyrë që të përforcohen kapacitetet e tyre.

Gjithashtu tha se do të merren me punësimin e serbëve të Kosovës.

E Sllobodan Petroviq, kryetar i Partisë së Pavarur Liberale, tha se dhjetëra njerëz kanë mbetur pa punë, e qindra pa ndihmë sociale, ndërkohë që sipas tij për të gjitha ka argumente konkrete të cilat ia kanë dorëzuar Prokurorisë.

Sipas tij, nuk ka pasur asnjë reagim ndaj atyre ngjarjeve.

“Kjo është çdo gjë tjetër përveç fushatë, me keqardhje, kjo është ajo që me muaj të tërë e kemi paralajmëruar, këto janë gjërat për të cilat jemi frikësuar dh e po ndodhin. Këto u realizuan edhe në masë më të madhe se sa kemi pritur. Që problem të bëhet edhe më i madh, këtë e kemi pasur në vitin 2014 dhe 2017, në zgjedhjet e fundit parlamentare, të gjitha këto detaje, të gjitha këto presione, kërcënime janë në raportet e vëzhguesve evropianë, ata kanë dhënë mbi 20 sugjerime në çfarë mënyrë dhe kush kënd e ka kërcënuar dhe qind për qind njerëzit që kanë kërcënuar kanë qenë nga Lista Serbe dhe asnjë nga sugjerime nuk është respektuar….. Komuniteti serb janë të frikësuar, kurrë nuk kanë pasur situatë më të vështirë se sa e kanë sot dhe thjesht e pabesueshme por e vërtetë, që ata që do të duhej t’i mbronin serbët e Kosovës, ata e bëjnë presionin dhe me ata i kanë problemet më të mëdha”, tha ai.

Sipas Aleksandër Jabllanoviq nga Partia e Serbëve të Kosovës, tha se serbët në Kosovë nuk frikësohen nga shqiptarët, por nga vet serbët.

“Serbët çdo ditë e më pak u frikësohen shqiptarëve, e çdo ditë e më shumë serbëve, mjediset tona nuk janë të shëndosha për jetesë. Tema jonë është që në mënyrë më aktive të zgjedhim këtë problem”, tha ai.

Duke folur për programin qeverisës, ai përmendi dialogun Kosovë-Serbi dhe kufijtë.

“Ne duhet ta shkrijmë atë dialog sepse ka të bëjë në radhë të parë për ne. Ne jemi për interesat e Beogradit në Kosovë që dëshiron t’i realizojë përmes dialogut por për këtë shkak ne nuk do t ë pranojmë që qëllimet dhe interesat tonë t’i lëmë anash. Tema për kufij, ne nuk kemi me kënd të vendosim kufij. Ajo që presim nga zgjedhjet është rezultat i mirë për partinë e serbëve të Kosovës dhe për partitë e bashkëbiseduesve të mi këtu, të gjithë meritojmë dhe dëshirojmë t ë prezantojmë popullin tonë siç duhet pa përzierja nga anash. Fillimin e fushatës e vlerësojmë njëjtë keq sikur në vitin 2017, fushata është agresive, shpesh me metoda kriminale që i zbatojnë kolegët tonë nga Lista Serbe që nuk kanë ardhur sot këtu”, tha ai.

Ai tha se po presin reagimet e policisë dhe gjykatave për të gjitha ato kërcënime që sipas tij i kanë parë dhe evidentuar .

Në tryezën e organizuar nga Fondacioni Kosovar për Shoqëri të Hapur, nuk mori pjesë përfaqësuesi i Listës Serbe, Goran Rakiq, për të cilën u tha se i është dërguar ftesa por nuk kanë marrë përgjigje.