Presidenti i klubit anglez pëson goditje në tru, dërgohet me urgjencë në spital

Presidenti i Birmingham City-t, Tom Wagner, ka pësuar një goditje në tru dhe është dërguar me urgjencë në spital për trajtim të menjëhershëm.

Lajmi u konfirmua nga klubi anglez, i cili bëri të ditur se 56-vjeçari po merr kujdes mjekësor dhe është në gjendje të qëndrueshme.

Shefi ekzekutiv i Birminghamit, Jeremy Dale, njoftoi se Wagner do të tërhiqet përkohësisht nga detyrat e përditshme për t’u fokusuar në rikuperimin e tij. Në një deklaratë zyrtare, klubi theksoi se ndërhyrja e shpejtë mjekësore ishte vendimtare dhe se shenjat e para të rikuperimit janë pozitive.

“Tom mbetet i lidhur ngushtë me klubin dhe mezi presim ta mirëpresim sërish. Angazhimi i tij dhe i ekipit Knighthead ndaj Birmingham Cityt mbetet i pandryshuar dhe planet tona vazhdojnë normalisht nën një drejtim të fortë”, thuhet në deklaratë, duke kërkuar gjithashtu respektimin e privatësisë së tij gjatë kësaj periudhe.

Wagner mori drejtimin e klubit në korrik 2023 përmes kompanisë së tij Knighthead dhe ka qenë një figurë aktive në projektet ambicioze të Birminghamit.