Prokuroria merr vendim për të arrestuarin në rastin e vdekjes së të 18 vjeçares në Ferizaj

Rasti që tronditi dje mbarë vendin, ai i 18 vjeçares në Ferizaj, Marigona Osmani, e cila u la e vdekur në Spitalin e Përgjithshëm të Ferizajt, po trajtohet nga organet e rendit me prioritet të lartë, raporton IndeksOnline.

Menjëherë është arritur që të kapet njëri nga të dyshuarit e këtij rasti. Bëhet fjalë për Arbër Sejdiun, e për të cilin tashmë Prokuroria e këtij qyteti ka vendosur masën e ndalimit prej 48 orësh.

Ndërsa i dyshuari kryesor Dardan Krivaqa ende është në arrati.

Njoftimi i plotë i prokurorisë:

Prokuroria Themelore në Ferizaj,  Departamenti për Krime të Rënda, njofton opinionin publik se lidhur me rastin e vdekjes së 18 vjeçares në Ferizaj,  me vendim të prokurorit, është ndaluar një (1) person i dyshuar, me inicialet A.S., në kohëzgjatje prej 48 orësh, për shkak të dyshimit se i njëjti në bashkëkryerje ka kryer veprën penale  “Vrasje e rëndë” të Kodit Penal të Republikës së Kosovës (KPRK).

Ndërsa, i dyshuari tjetër D.K., që gjendet ende në arrati, dyshohet se për motive të ulëta, ka keqtrajtuar fizikisht tani të ndjerën M.O., e cila si pasojë e lëndimeve të marra ka ndërruar jetë dhe vdekjen e saj e kanë konstatuar mjekët në Qendrën Emergjente në Ferizaj, ku me ç’rast i njëjti dyshohet se ka kryer veprën penale “Vrasje e rëndë” të Kodit Penal të Republikës së Kosovës (KPRK).

Me urdhër të prokurorit, trupi i pa jetë i viktimës është dërguar për obduksion, në Institutin e Mjekësisë Ligjore.

Prokuroria Themelore në Ferizaj në bashkëpunim me Policinë e Kosovës kanë ndërmarrë të gjitha veprimet e nevojshme hetimore dhe janë duke punuar rreth zbardhjes së të gjitha rrethanave të ngjarjes.