Protesta masive në Izrael, kërkohet t’i jepet fund luftës

Dhjetëra mijëra izraelitë po protestojnë masivisht në Tel Aviv, për të shënuar dy vjetorin e sulmit të 7 tetorit – dhe për të ushtruar presion mbi Benjamin Netanyahun që të mbyllë marrëveshjen në Gaza dhe të kthejë të gjithë pengjet.

“Jemi në ditët vendimtare për një marrëveshje”, tha Forumi i Pengjeve dhe Familjeve të Zhdukura.

“Ky është momenti kur i gjithë Izraeli duhet të qëndrojë së bashku dhe të kërkojë me zë të lartë – të bëjë gjithçka që është e mundur për të sjellë vëllezërit dhe motrat tona në shtëpi.”

Familjet e pengjeve shprehën optimizëm se propozimi i fundit për armëpushim do t’i sillte pengjet në shtëpi.

Presidenti amerikan Donald Trump i tha Netanyahut të ndalonte bombardimin e Gazës, pasi Hamasi pranoi pjesët kryesore të propozimit të SHBA-së që përfshinin lirimin e 48 pengjeve që ende mbahen në Gaza – 20 prej të cilëve mendohet se janë ende gjallë.

Një fund i luftës në Gaza duket më afër tani se kurrë më parë.

“Dje shkuam për të fjetur me optimizëm të kujdesshëm pas shumë muajsh bllokimi”, tha Ruby Chen, babai i pengut të vrarë Itay Chen, 19 vjeç.

“Është një situatë e brishtë dhe nuk duam të zhgënjehemi përsëri”, shtoi Viki Cohen, nëna e pengut 21-vjeçar Nimrod Cohen.

“Ndihem e emocionuar, me shpresë dhe pritje, por edhe me frikë se diçka do të shkojë keq me negociatat.”

Disa nga protestuesit mbanin një banderolë të madhe që shkruante “tani ose kurrë”.

“Marrëveshja është në tryezë, ishte aty gjatë gjithë kohës”, brohorisnin ata.