Publikohen rezultatet e testit kualifikues për 21 prokurorë të rinj

Këshilli Prokurorial i Kosovës (KPK) ka publikuar rezultatet e testit kualifikues për rekrutimin dhe emërimin e 21 prokurorëve të rinj në prokuroritë themelore të Republikës së Kosovës.
Komisioni për Rekrutim i Këshillit Prokurorial të Kosovës, në pajtim me nenin 21 të Rregullores nr.02\2022 për rekrutimin, provimin, emërimin dhe riemërimin e prokurorëve, ka njoftuar kandidatët për prokurorë të shtetit për rezultatet e testit kualifikues, raporton “Betimi për Drejtësi“.
Sipas rezultateve, 138 kandidatë e kanë kaluar testin kualifikues, ndërsa në listën e kandidatëve që nuk e kanë kaluar testin kualifikues janë 190 kandidatë, prej tyre 8 figurojnë si të diskualifikuar dhe një ka abstenuar.
Lidhur me këto rezultate, kandidatët kanë të drejtë të parashtrojnë ankesë tek Komisioni për Rishqyrtim brenda afatit prej tri ditësh nga dita e shpalljes së rezultateve.
Ndryshe, testi kualifikues u mbajt më 30 gusht 2025, në Akademinë e Kosovës për Siguri Publike, në Vushtrri.
Në testin kualifikues, si fazë e përcaktuar në kuadër të procedurave të rekrutimit morën pjesë 330 kandidatë, ndonëse të drejtën për t’iu nënshtruar këtij testi e kishin fituar 402 kandidatë, 211 prej tyre burra dhe 191 gra.
Procesi për rekrutimin e prokurorëve zhvillohet bazuar në rregulloren nr. 02/2022 për Rekrutimin, Provimin, Emërimin dhe Riemërimin e Prokurorëve të Shtetit.
Procesi është vëzhguar dhe nga Misioni i Bashkimit Evropian për Sundimin e Ligjit (EULEX) dhe Instituti i Kosovës për Drejtësi (IKD).
Procesi i rekrutimit do të vazhdojë me fazat e tjera si testin me shkrim dhe intervistimin e kandidatëve, proces të cilin IKD do ta monitorojë deri në fund. Ndërsa, KPK në komunikatën për media ka thënë se edhe fazat tjera do i zhvillojë në përputhje me standardet më të avancuara të meritokracisë, profesionalizmit dhe paanësisë, të garantuara me legjislacionin përkatës dhe praktikat më të mira ndërkombëtare në fushën e prokurorisë.