Pulisic flet pas dygolëshit ndaj Torinos: Isha i ‘vdekur’ në shtrat para dy ditësh

Christian Pulisic pranon se ishte “i vdekur në shtrat dy ditë më parë” pas rikuperimit dhe shënimit të dy golave në fitoren 3-2 të Milan ndaj Torinos, ndërsa Adrien Rabiot tregon për golin e tij të jashtëzakonshëm.

Ylli i kombëtares amerikane nuk ishte as pjesë e skuadrës deri pasdite, pasi ishte në shtrat me temperaturë të lartë mbrëmë dhe udhëtoi për t’iu bashkuar bashkëlojtarëve vetëm disa orë para fillimit të ndeshjes.

Megjithatë, ai u bë hero duke dalë nga stoli dhe shënoi dy gola, duke kthyer një disavantazh 2-0 në fitore 3-2, së bashku me goditjen spektakolare të Rabiot nga 29 metra.

“Dy ditë më parë isha i shtrirë në shtrat, por sot ndihesha shumë më mirë dhe jam shumë i lumtur që erdha këtu dhe arrita të ndihmoj skuadrën,” tha Pulisic për “Sky Sport Italia”.

“Nuk e dija dje nëse do të mund të luaja, por këtë mëngjes ndihesha shumë më mirë. Jam më i lumtur për fitoren sesa për golat, me të vërtetë”, shtoi ai.

Pavarësisht se ka luajtur më pak se në kampionatet e mëparshme për shkak të problemeve të ndryshme me dëmtimet, Pulisic ka qenë më produktiv, duke shënuar shtatë gola në vetëm nëntë ndeshje në Serie A.

“Ka qenë një sezon mjaft i çuditshëm, dua të arrij më shumë minutazh në fushë. Duhet ta marrim një ndeshje në një kohë dhe pastaj do të shohim ku do të jemi në fund të sezonit”, u shpreh ai.

Fitorja mban Milanin në krye të tabelës së Serie A së bashku me Napoli, një pikë para rivalëve Inter, dhe i jep fund zhgënjimit të mesjavës pas eliminimit nga Coppa Italia ndaj Lazios.

“Filluam keq, por që në gjysmën e parë e bëmë më mirë dhe i thëmë vetes se duhet të ishim më të vendosur në pjesën e dytë. Menjëherë pamë ndryshimin e ritmit, dhe futja e Christian-it na bëri shumë mirë,” tha Rabiot për “Sky Sport Italia”.

“Këto janë ndeshjet që mund të ndryshojnë sezonin, tregojnë se jemi këtu me vendosmëri dhe fokus. Duhet të përmirësojmë qasjen në fillim, sepse nuk mund të vijmë gjithmonë nga 2-0 në fitore 3-2”, vazhdoi ai.

Goditja e Rabiot ishte e jashtëzakonshme, ndoshta më e bukura në karrierën e tij, dhe duket se erdhi nga asgjëja.

“Nevojitej diçka, herë pas here duhet të provosh diçka që mund të ndryshojë lojën. Kishte gabime, por e rëndësishme ishte mentaliteti dhe fryma që treguam për ta kthyer ndeshjen, duke përfshirë edhe ata që erdhën nga stoli. Do të shohim ku do të përfundojmë, por me këtë mentalitet mund të shkojmë larg”, përfundoi francezi.

Megjithatë, ka pasur edhe lajme shqetësuese, pasi Rafael Leao doli nga fusha në pjesën e parë me një dëmtim të dyshuar në aduktorin e këmbës së djathtë.