Putin urdhëron përgatitjen e propozimeve për rifillimin e testimeve bërthamore
Presidenti rus Vladimir Putin ka urdhëruar zyrtarët e tij të lartë të hartojnë propozime për mundësinë e rifillimit të testimeve të armëve bërthamore, pasi presidenti amerikan Donald Trump deklaroi javën e kaluar se Shtetet e Bashkuara do të rinisin testimet e tilla.
Putin theksoi se Rusia gjithmonë i është përmbajtur rreptësisht detyrimeve të saj në kuadër të Traktatit për Ndalimin Gjithëpërfshirës të Testeve Bërthamore (CTBT), por paralajmëroi se nëse Shtetet e Bashkuara ose ndonjë fuqi tjetër bërthamore do të kryejë testime, edhe Rusia do të veprojë në të njëjtën mënyrë.
Ministri rus i Mbrojtjes, Andrei Belousov, i tha Putinit se deklaratat dhe veprimet e fundit nga Uashingtoni e bëjnë “të këshillueshme përgatitjen e menjëhershme për testime të plota bërthamore”. Ai shtoi se poligoni në Arktik, në Novaya Zemlya, është gati të presë testime të tilla në një kohë të shkurtër.
“Urdhëroj Ministrinë e Jashtme, Ministrinë e Mbrojtjes, shërbimet e veçanta dhe agjencitë përkatëse civile që të mbledhin çdo informacion shtesë mbi këtë çështje, ta analizojnë atë në Këshillin e Sigurisë dhe të paraqesin propozime të përbashkëta për mundësinë e nisjes së përgatitjeve për testime bërthamore,” deklaroi Putin.
Shtetet e Bashkuara kanë kryer testin e fundit bërthamor në vitin 1992, ndërsa Kina dhe Franca në vitin 1996. Bashkimi Sovjetik e kishte kryer testin e fundit në vitin 1990, ndërsa Rusia post-sovjetike, e cila trashëgoi arsenalin bërthamor sovjetik, nuk ka kryer asnjë test të tillë që prej atëherë.
