Qelaj për Ombudspersonin në Hagë: S’ka ofruar informata, s’ka interes për bashkëpunim

Avokati i Popullit, Naim Qelaj, ka shprehur shqetësimin e tij për proceset gjyqësore që po mbahen në Dhomat e Specializuara të Kosovës në Hagë.

Në konferencën e fundit për këtë vit ku u prezantuan rezultatet e punës njëvjeçare, Qelaj ka thënë se Avokati i Popullit mund të kryejë vetëm një rol atje, dhe atë si mik i gjykatës.

“Unë kam shprehur shqetësim në raport me ekipet mbrojtëse. Çdo hetim i mbrojtës lejon mundësi për dyshim dhe ndikim, dhe i qëndroj mbështetur kësaj deklarate. Do të jetë në interes të Avokatit të Popullit që të monitorojë disa nga seancat, sepse të gjitha nuk mundemi për shkak të kostos. Avokati i Popullit mund të kryejë vetëm një rol atje, si mik i gjykatës”, u shpreh Qelaj, teksa shprehi kritika edhe ndaj Ombudspersonit për mungesë bashkëpunimi. 

Ky i fundit ka rol në trajtimin e ankesave dhe do të bën verifikimin e shkeljeve të mundshme të të drejtave të njeriut, sipas konventës ndërkombëtare për të drejtat dhe liritë e njeriut.

“Ka një avokat (Ombudsperson) të caktuar nga gjykata dhe unë kam komunikuar me të. Kam parë që ai nuk shpreh interesin për bashkëpunim dhe nuk ka ofruar informata që mund të jenë publike. Duke pasur parasysh punën që po bën Avokati i Popullit atje, nuk është i standardeve dhe nuk i plotëson kërkesat që avokati duhet të jetë i pavarur dhe i paanshëm”, ka thënë Qelaj, transmeton EO-ja.