Qeveria e Kosovës del edhe me një sqarim për subvencionimin e energjisë elektrike

Qeveria e Kosovës, ka bërë të ditur se të gjithë qytetarët që konsumojnë mbi 600 kWh, do tu subvencionohet 600 kWh i parë.

Qeveria e Kosovës, është sqaruar lidhur me subvencionimin e energjisë elektrike. Rritja e energjisë elektrike do të nisë në muajin shkurt 2022, dhe qeveria ka premtuar 75 milionë euro subvencionime.

Sipas qeverisë, tarifës së re i nënshtrohet energjia e konsumuar mbi 600 kWh, e cila, sipas tyre, po ashtu do të jetë e subvencionuar pjesërisht nga qeveria, ndërsa thanë se nuk është e vërtetë që qytetarët që konsumojnë mbi 600 kWh nuk do të përfitojnë nga subvencionimi.

Ndërsa, sa i përket raportit të ZRRE-së për ngritjen e tarifave, qeveria tha se nuk e kanë miratuar atë raport, por do t’i dërgojnë ZRRE-së komentet në lidhje me këtë raport.

Kurse, sa i përket subvencionimit për biznese, qeveria tha se kjo e mbron secilin qytetarë të Kosovës duke parandaluar efektin zingjiror të rritjes së çmimeve të mallrave dhe shërbimeve, si dhe sipas tyre, duke mbrojtur sigurinë e vendeve të punës.

“Të gjithë qytetarëve, edhe atyre që konsumojnë mbi 600 kWh, do t’u subvencionohet 600 kWh i parë. Tarifës së re i nënshtrohet energjia e konsumuar mbi 600 kWh, e cila tarifë po ashtu do të jetë e subvencionuar nga Qeveria”, thuhet në reagim.