Qeveria merr vendim për themelimin e Komisionit për hapjen e fabrikës dhe prodhimit të municionit

Kryeministri i Kosovës, Albin Kurti, ka thënë se qeverisja e tij ka treguar që mbrojtja ka qenë ndër prioritet kryesore.

Në mbledhjen e qeverisë, ai tha se do ta themelojnë komisionin ndërministror me qëllim të vlerësimit dhe nisjes së procedurave lidhur me hapjen e fabrikës dhe prodhimit të municionit.

“Qeveria jonë ka treguar që mbrojtja ka qenë ndër prioritet tona kryesore dhe kjo është dëshmuar në vazhdimësi, si me numrin e ushtarëve të dyfishuar si me buxhetin për Ministrinë e Mbrojtjes që është treshifuar, si me trajnimin e oficerëve jashtë vendit që është katërfishuar, si me investimet në armatim që jabë shumëfishuar”, tha Kurti.

Ai ka theksuar se do të themelohet Komisioni ndërministror për vlerësimin e nisjes së procedurave lidhur me hapjen e fabrikës dhe prodhimit të municionit.

“Këtë ditë të rëndësishme për ushtrinë tonë po e shënojmë me një vendim të rëndësishëm që porsa e nënshkrova dhe me një hap të domosdoshëm besoj për të garantuar zhvillimin e qëndrueshëm të saj. Do ta themelojmë komisionin ndërministror për qëllim të vlerësimit dhe nisjes së procedurave lidhur me hapjen e fabrikës dhe prodhimit të municionit dhe për laboratorë mbi disenjimin e fluturakeve pa pilot mbi territorin e Kosovës”, tha ai.