Raketa “e paprekshme” e Putinit rrëzohet nga forcat ukrainase

Forcat ukrainase kanë arritur të shkatërrojnë një nga raketat e reja hipersonike të Rusisë, duke e goditur atë në një bazë ushtarake brenda territorit rus, njoftuan zyrtarët e lartë të Kievit.

Raketa Oreshnik, e cila udhëton me shpejtësi dhjetë herë më të madhe se ajo e zërit dhe është cilësuar nga presidenti rus Vladimir Putin si “e paprekshme ndaj sistemeve të mbrojtjes ajrore” dhe “një armë që ndryshon lojën”, u godit në poligonin ushtarak të qitjes Kapustin Yar, pranë Detit Kaspik në Rusinë jugperëndimore, rreth 500 kilometra nga kufiri ukrainas.

Kreu i Shërbimit të Sigurisë së Ukrainës (SBU), Vasyl Maliuk, e përshkroi misionin si “shumë të suksesshëm”.

Nuk dihet ende se sa raketa Oreshnik ka Rusia, por sipas Putinit, ato janë aktualisht në fazë prodhimi.

Sipas Maliukut, Ukraina ka kryer gjithashtu 20 sulme ndaj objekteve të naftës në Rusi, duke shkaktuar një ulje prej 20% të prodhimeve të naftës në tregun e brendshëm rus.