Rama kritikon arbitrin Taylor: Kishte ardhur për të ngrënë drekë, na solli shiun në Tiranë
![](https://indeksonline.net/wp-content/uploads/2024/05/900-0-1716307286xtaylor-670.png)
Partizani dështoi të fitojë titullin e dytë kampion radhazi, pasi u mposht me rezultatin minimal 1-0 nga Egnatia në finalen e titullit të zhvilluar mbrëmjen e të dielës në “Air Albania”.
Drejtuesi i të kuqve, Olsi Rama shpërtheu ndaj arbitrit në përfundim të ndeshjes, duke kritikuar jo pak anglezin Anthony Taylor, i cili ishte përzgjedhur për të vënë drejtësi në finalen e titullit në Tiranë.
![](https://indeksonline.net/wp-content/uploads/2024/05/GOhVJvTXIAEMYLv.jpg)
“Nuk është asnjëherë mirë të humbësh një ndeshje si kjo. Kishte ardhur një arbitër që na solli edhe shiun në Tiranë. Ai kishte ardhur për pushime dhe nuk e kishte mendjen aspak te ndeshja. Nuk më pëlqeu aspak. Dha vetëm 7 minuta shtesë, ndërkohë që në pjesën e dytë u luajt shumë pak. Por ai nuk donte të rrinte edhe 30 minuta në Shqipëri. Erdhi, hëngri një drekë dhe nxitoi për të ikur”, u shpreh Rama.
![](https://indeksonline.net/wp-content/uploads/2024/05/Rama-Olsi-1024x576.jpg)
Drejtori teknik i Partizanit pranoi edhe gabimet e “të kuqve”, teksa theksoi se qasja e skuadrës në pjesën e parë ishte larg pritshmërive dhe se nuk duhet toleruar një gjë e tillë.
“Edhe ne kemi gabimet tona, pasi nuk na lejohet kurrsesi të hyjmë në fushë ashtu si në pjesën e parë të finales. Ishim pa grintën dhe dëshirën e duhur. Ndryshuam në pjesën e dytë, por nuk arritëm të ndryshojmë rezultatin e ndeshjes. Do të analizojmë edhe paraqitjen tonë për të nxjerrë konkluzionet”, u shpreh Rama.