Rënia e numrit të të infektuarve/ Këtyre komunave u hiqet ora policore

Ministri i Shëndetësisë, Armend Zemaj, ka bërë me dije se ka ndryshuar renditja e komunave nëpër zona.

Prishtina, Zveçani, Zubin-Potoku, Fushë-Kosova, Obiliqi, Mitrovica e Jugut, Mitrovica e Veriut, Leposaviqi, Lipjani, Drenasi dhe Podujeva, aktualisht janë në “Zonën e kuqe”.

Në komunat që gjenden në zonën e kuqe, nga ora 19:00 mbyllet çdo aktivitet ekonomik dhe vendoset kufizim i plotë i lëvizjes së qytetarëve, do të ketë orë policore në këto komuna, si edhe ndalohen hyrjet-daljet në to deri në orën 05:00.

11 komuna gjenden ende në “Zonën e verdhë”. Pjesë e kësaj zone janë: Kamenica, Kllokoti, Gjilani, Peja, Vushtrria, Ferizaj, Gjakova, Vitia, Shtërpca, Istogu dhe Ranillugu.

Në komunat, të cilat bëjnë pjesë në “Zonën e verdhë”, operatorët ekonomikë lejohen të punojnë nga ora 05:00 deri në orën 18:00.

Shërbimet e hotelerisë dhe gastronomisë lejohen të punojnë nga ora 05:00 deri në orën 18:00, pas orës 18:00 punojnë me shërbim “Merr me vete” dhe “Porosi me dërgesë”.

Qendrat tregtare lejohen të punojnë prej orës 05:00 deri në ora 18:00.

Ndërkohë, në “Zonën e gjelbër” janë 16 komuna: Gracanica, Klina, Hani i Elezit, Suhareka, Malisheva, Parteshi, Kaçaniku, Dragashi.

Në komunat që hyjnë në këtë zonë me rrezik më të ulët të përhapjes së koronavirusit, operatorët ekonomikë do të lejohen të punojnë nga ora 05:00 deri në orën 20:00.

Transporti publik në këto komuna, do të lejohet të punojë deri në 50 për qind të kapaciteteve.

Qendrat tregtare në këto komuna do të mund të punojnë nga ora 5 e mëngjesit deri në orën 20. Veprimtaria e hotelerisë dhe gastronomisë ndalohet pas orës 20:00, përveç shërbimit ”Merr me vete” dhe “Porosi me dërgesë”.