12:13 / E Martë, 04 Gusht 2020

Rënie historike e bujtjeve në hotelet e Zvicrës

Industria e hotelerisë në Zvicër në gjysmën e parë të vitit 2020 ka regjistruar gjithsej 9.9 milionë bujtje. Kjo korrespondon me një rënie historike prej 47.5 për qind në krahasim me të njëjtën periudhë të një viti më parë, thuhet në një komunikatë të Zyrës Federale të Statistikave (BFS).

Në qershor, megjithatë, numri i qëndrimeve gjatë natës në hotelet zvicerane është rritur ndjeshëm në krahasim me muajin pararendës të majit. Siç shihet në raport, gjatë qershorit ka pasur 1.4 milion bujtje, transmeton albinfo.ch. Kjo është 62 për qind më pak se në qershor 2019.

Por, në krahasim me majin e këtij viti, megjithatë, është një rritje e konsiderueshme, pasi BFS gjatë majit kishte numëruar vetëm 0.6 milion bujtje. Ndërsa në prill ka qenë edhe më keq: ka pasur vetëm 0.2 milion sosh.

Shumica e bujtësve ishin nga Zvicra. Rënia e numrit të mysafirëve vendës ishte vetëm për një të katërtën, ndërsa numri i turistëve të huaj ka rënë për 88 për qind në qershor.

Më e keqja ishte rënia në prill, kur  ishin prenotuar 92.4 për qind më pak qëndrime gjatë natës, përcjell albinfo.ch. Në maj, rënia ishte për 79.2 përqind. Në mars, kur Këshilli Federal pati vendosur masat kundër pandemisë dhe kishte mbyllur kufijtë në mes të muajit, numri i bujtjeve qe  zvogëluar për 62.3 për qind.