Rezistenca ndaj antibiotikëve po rritet më shpejt se zhvillimi i barnave të reja
Përpjekjet e industrisë farmaceutike për të luftuar rezistencën ndaj antimikrobikëve po mbeten prapa përhapjes së infeksioneve rezistente ndaj barnave, sipas një raporti të ri ndërkombëtar.
Raporti i publikuar nga Access to Medicine Foundation tregon se numri i projekteve për zhvillimin e barnave kundër rezistencës antimikrobike (AMR) është ulur ndjeshëm gjatë pesë vjetëve të fundit.
Sipas të dhënave, pipeline-i i antibiotikëve është zvogëluar me 35 për qind, duke rënë nga 92 projekte në vitin 2021 në vetëm 60 në vitin 2026 në kompanitë e mëdha farmaceutike që merren me kërkim dhe zhvillim.
Drejtoresha ekzekutive e fondacionit, Jayasree K. Iyer, theksoi në raport se nevoja për antibiotikë të rinj është më e madhe se kurrë.
Sipas saj, nëse nuk ndërmerren ndryshime të rëndësishme, rezistenca ndaj antibiotikëve mund të shkaktojë një rritje të ndjeshme të vdekjeve nga infeksionet e parandalueshme në dy dekadat e ardhshme, veçanërisht në vendet me të ardhura të ulëta dhe të mesme.
Raporti analizoi aktivitetet kërkimore dhe zhvillimore të 15 kompanive farmaceutike, përfshirë gjigantët ndërkombëtarë si GSK, Pfizer, Shionogi, MSD dhe Otsuka Pharmaceutical.
Sipas raportit, kompania britanike GSK mbetet lider në këtë fushë, me 30 projekte në zhvillim, që përfshijnë vaksina parandaluese dhe trajtime antibakteriale.
Ndërkohë, kompania japoneze Shionogi ka kaluar në vendin e dytë, duke lënë pas Pfizer-in, e cila e mbante këtë pozicion në vitin 2021.
Megjithatë, raporti thekson se asnjë kompani nuk është ende pranë arritjes së potencialit të plotë në luftën kundër rezistencës ndaj antibiotikëve.
Rezistenca ndaj antimikrobikëve ndodh kur bakteret, viruset, kërpudhat dhe parazitët nuk reagojnë më ndaj barnave që përdoren për trajtimin e tyre. Edhe pse është një proces natyror që ndodh me kalimin e kohës, ai po përshpejtohet nga përdorimi i tepruar dhe i gabuar i antibiotikëve.
Sipas të dhënave të World Health Organization, deri në fund të vitit 2025 një në gjashtë infeksione bakteriale të konfirmuara në laborator është rezistente ndaj trajtimeve standarde.
Në Bashkimin Evropian, rezistenca ndaj antibiotikëve shkakton më shumë se 35 mijë vdekje çdo vit, ndërsa në nivel global parashikohet që deri në vitin 2050 rreth 39 milionë vdekje të lidhen drejtpërdrejt me infeksionet bakteriale rezistente.
Raporti thekson gjithashtu se fëmijët, veçanërisht në vendet me të ardhura të ulëta dhe të mesme, janë ndër më të rrezikuarit nga infeksionet.
Megjithatë, vetëm pesë barna pediatrike janë aktualisht në zhvillim për trajtimin e këtyre infeksioneve. Vetëm 13 për qind e projekteve në zhvillim janë të destinuara për fëmijët nën pesë vjeç.
Ekspertët paralajmërojnë se pa reforma globale në financim, rregullim dhe furnizim me antibiotikë, përpjekjet për të luftuar rezistencën antimikrobike do të vazhdojnë të jenë reaktive dhe jo parandaluese, duke rritur kostot dhe humbjet në jetë njerëzore.
