Rubio: Sulmi izraelit në Katar shtyu Hamasin drejt bisedimeve për Gazën
Sekretari amerikan i Shtetit, Marco Rubio, ka komentuar sulmin ajror izraelit të shtatorit në Doha, Katar, kundër udhëheqësve të Hamasit, duke thënë se ai “krijoi një ndjenjë urgjence për të përfunduar luftën në Gazë para se ajo të përhapet.”
Gjatë një konference për shtyp, Rubio ka shtuar se një nga faktorët që shtyu Hamasin drejt tryezës së bisedimeve ishte roli konstruktiv i vendeve si Katari dhe Turqia, të cilat kanë marrëdhënie me Hamasin dhe ushtruan presion për të nënshkruar një marrëveshje.
“Ne luajtëm një rol të ngjashëm në anën tjetër,” tha Rubio, duke iu referuar presionit amerikan ndaj Izraelit për të pranuar armëpushimin në tetor.
Sulmi izraelit në Katar – një aleat kyç i SHBA-së dhe ndërmjetës në negociata – pati shkaktuar reagime të forta ndërkombëtare në atë kohë, por sipas Rubio-s, ai kontribuoi në shtytjen drejt një zgjidhjeje diplomatike që çoi në armëpushimin aktual.
Rubio gjithashtu nuk e përjashtoi mundësinë që SHBA-të të ndjekin një plan çarmatosjeje për Hamasin, duke bërë dallim mes armëve të rënda dhe atyre të lehta.
“ Nuk do të hyj në detaje të negociatave të tilla. Do të kërkoja nga të gjithë të përqendrohen te lloji i armëve dhe kapaciteteve që Hamasit i duhen për të kërcënuar ose sulmuar Izraelin – kjo të jetë baza për atë që duhet të duket çarmatosja. Nëse Hamasi arrin të jetë në pozicion që të kërcënojë ose sulmojë Izraelin, nuk do të kemi paqe. Askush nuk do të bindet të investojë para në Gazë nëse beson se një luftë tjetër do të ndodhë pas dy-tre vitesh… Prandaj çarmatosja është kaq kritike. Çfarë përfshin kjo saktësisht, do ta lëmë te ekipet teknike ta punojnë. Duhet të jetë diçka që partnerët tanë mund t’i detyrojnë ata të pranojnë. Gjithashtu duhet të jetë diçka që Izraeli e pranon që kjo të funksionojë,” përfundoi Rubio.
