Rusia: 700 mijë fëmijë nga Ukraina kanë gjetur strehim tek ne

Rusia ka larguar 700 000 fëmijë nga zonat e konfliktit në Ukrainë për në territorin rus, tha Grigory Karasin, kreu i komitetit ndërkombëtar në Këshillin e Federatës.

“Vitet e fundit, 700,000 fëmijë kanë gjetur strehim tek ne, duke ikur nga bombardimet dhe granatimet nga zonat e konfliktit në Ukrainë.”, shkroi Grigory Karasin në llogarinë e tij në Telegram.

Reuters raporton se Moska thotë se programi i saj për sjelljen e fëmijëve nga Ukraina në territorin rus është të mbrojë jetimët dhe fëmijët e braktisur në zonat e konfliktit.

Megjithatë, Ukraina pretendon se shumë fëmijë janë dëbuar ilegalisht dhe SHBA thotë se mijëra fëmijë janë larguar me forcë nga shtëpitë e tyre.

Pjesa më e madhe e lëvizjes së njerëzve dhe fëmijëve ndodhi në muajt e parë të luftës, e cila filloi në shkurt 2022.

Në korrik 2022, SHBA vlerësoi se Rusia kishte “deportuar me forcë” 260,000 fëmijë, ndërsa ministria e Integrimit të territoreve të okupuara të Ukrainës thotë se 19,492 fëmijë ukrainas konsiderohen aktualisht të dëbuar ilegalisht./abcnews.al