Rusia paralajmëron masa ndëshkuese për Kosovën pas arrestimit të shtetasit të saj
Ministria e punëve të jashtme të Rusisë ka kërcënuar Kosovën me pasoja, për shkak siç shkruajnë mediat serbe, të ‘’mos respektimit të Kombeve të Bashkuara nga ana e Prishtinës’’.
Sipas këtij njoftimi të MPJ-së, Rusia ka paralajmëruar se do të ndërmarrë gjithçka që është e nevojshme që të mbrojë shtetasin e vet, punëtorin Mikhail Krasnoshchenko, i cili është arrestuar të martën nga Policia e Kosovës gjatë aksionit në veri.
Të njëjtin, sot Kryeministri Ramush Haradinaj e ka shpallur person “non-grata’.
“Veprimet e autoriteteve në Kosovë i shohim si përkeqësim shtesë të marrëdhënieve ndëretnike në krahinë dhe si përbuzje ndaj normave ndërkombëtare të komunikimit diplomatik. Rusia do të vazhdojë të ndërmarrë të gjitha masat e nevojshme për të mbrojtur qytetarët e saj në pajtim me të drejtën ndërkombëtare dhe legjislacionin kombëtar”, thuhet në njoftimin e MPJ-së së Rusisë, shkruan B92, transmeton Indeksonline.
Ndërsa, Kryministri i Kosovës, Ramush Haradinaj ka deklaruar se veprimet e shtetasit rus, pjesëtar i UNMIK-ut janë kundër të drejtës dhe normave ndërkombëtare.
Sipas tij, pengimi i drejtësisë dhe keqpërdorimi i simboleve të OKB-së janë shkelje e rëndë.
“Policia e Kosovës gjatë operacionit kundër
krimit të organizuar dhe kontrabandës ka arrestuar një qytetar rus, një spiun
të kamufluar si punëtor i Organizatës së Kombeve të Bashkuara i cili ka penguar
sundimin e ligjit duke përdorur veturën zyrtare të OKB-së.
Veprimet e tij janë kundër së drejtës dhe normave ndërkombëtare. Pengimi i
drejtësisë dhe keqpërdorimi i simboleve të OKB-së janë shkelje e rëndë. Misioni
i Rusisë pranë OSBE-së duhet ta kuptojë se sundimi i ligjit është përgjegjësi e
jona ndaj të gjithë qytetarëve të Kosovës në një shoqëri që ne ndajmë së
bashku”, ka shkruar Haradinaj.
Kurse, Farhan Haq, zëdhënës i Sekretarit të Përgjithshëm të OKB-së, Antonio Guterres, i tha Zërit të Amerikës, se Kosova nuk mund të marrë një vendim të tillë, pasi OKB-ja nuk është shtet./Indeksonline/
