Ruzhdi Shehu betohet si kryetar i Komunës së Junikut

Kryetari i Komunës së Junikut  Ruzhdi Shehu, sot është betuar zyrtarisht për të filluar mandatin e tij të dytë në krye të komunës. Ceremonia u mbajt në sallën e Kuvendit komunal, në praninë e një numri të madh të ftuarish, përfaqësues institucionalë dhe qytetarë të Junikut.

 Shehu rifitoi drejtimin e komunës në zgjedhjet e balotazhit, duke siguruar bindshëm besimin e shumicës së votuesve.

Gjatë ceremonisë, krahas kryetarit, betimin e bënë edhe anëtarët e rinj të Asamblesë komunale, të cilët zyrtarizuan mandatin e tyre si përfaqësues të Kuvendit komunal të Junikut.

Në fjalimin e tij, kryetari Shehu theksoi përkushtimin ndaj qytetarëve dhe zhvillimit të komunës, ai u zotua se mandatin e dytë do ta udhëheqë me nder, transparencë dhe llogaridhënie, gjithmonë në shërbim të interesit të qytetarëve.

“Do të vazhdojmë të punojmë me përkushtim për Junikun, duke ruajtur vlerat tona dhe duke sjell zhvillim të qëndrueshëm për të gjithë qytetarët”, tha ndër të tjera kryetari Shehu.

Mbledhja solemne përfundoi me një koktej rasti, në një atmosferë festive për Komunën e Junikut.