“Sa mirë, aq edhe keq”/ Enrique flet për ndeshjen kundër Barcelonës

Luis Enrique ka komentuar shortin e Ligës së Kampionëve, ku mes të tjerash, bashkë me PSG-në do të ballafaqohet me Barcelonën.

Enrique ka çmuar lart ish-ekipin e tij, duke thënë se emocionet për këtë ndeshje janë të përziera, shkruan IndeksOnline.

“Të përballesh me Barcelonën në Ligën e Kampionëve? Është një ndjenjë pozitive dhe negative në të njëjtën kohë. Të kthehesh në Barcelonë është e veçantë, është shtëpia ime. Të luash kundër Barçës është gjithashtu e veçantë, sepse është një klub me lojtarë shumë cilësorë dhe futboll sulmues të shkëlqyer” u shpreh Enrique.

Ai tregoi edhe përse i dhemb të ballafaqohet me katalunasit.

“Nëse flas nga zemra, më dhemb të përballem me klubin që më ndihmoi më shumë. Është gjithmonë e vështirë dhe nuk jam i lumtur për këtë përballje. Është një ndjenjë e komplikuar për t’u shpjeguar” shtoi ai.

Enrique udhëhoqi Barcelonën për tri sezone, e që rezultuan tejet të suksesshme për ekipin.

bashkë me blaugranasit, ai fitoi 9 trofe, përfshirë La Liga-n, Kupën e Mbretit dhe Ligën e Kampionëve./IndeksOnline/