Sanksione të reja, planifikohet ndalimi i blerjes së arit nga Rusia

Ministrat e jashtëm të BE-së pritet të takohen sot në Bruksel për të diskutuar rreth sanksioneve kundër Rusisë, sipas një zyrtari të lartë të BE-së.

Ndër masat që po shqyrtohen është ndalimi i blerjeve të arit nga Rusia, një masë e vendosur tashmë nga partnerët ndërkombëtarë, shkruan The Guardian.

Një zyrtar i lartë i BE-së i tha Agence France-Presse se BE-ja ka të ngjarë të diskutojë sanksione të mëtejshme por nuk do të marrë një vendim të menjëhershëm.

“Masat e reja vijnë pasi lufta brutale e Rusisë kundër Ukrainës vazhdon pa pushim”, tha Ursula Von der Leyen.

“Prandaj, ne propozojmë të ashpërsojmë sanksionet e BE-së kundër Kremlinit, t’i zbatojmë në mënyrë më efektive dhe t’i zgjasim deri në janar 2023. Moska duhet të vazhdojë të paguajë një çmim të lartë për agresionin e saj”, theksoi ajo.

Josep Borrell, përfaqësues i lartë i Bashkimit Europian për çështjet e jashtme dhe politikën e sigurisë, shtoi se në mbledhjen e Këshillit do të propozojë që të rritet lista e personave të sanksionuar.

“Sanksionet e BE-së janë të ashpra dhe goditëse. Ne vazhdojmë të synojmë ata që janë afër Putinit dhe Kremlinit. Unë gjithashtu do të paraqes propozime në Këshill për sanksionimin e më shumë individëve dhe subjekteve.”