19:53 / E Martë, 06 Dhjetor 2022 / Andronika

Scholz konfirmon tekstin e përditësuar të planit franko-gjerman

Kancelari gjerman Olaf Scholz ka konfirmuar se versioni përfundimtar i propozimit të marrëveshjes së re gjithëpërfshirëse i është dorëzuar Kosovës dhe Serbisë.

Scholz theksoi se Gjermania është e përkushtuar për përparim në dialog.

“Sa i përket çështjes së propozimeve për normalizimin e marrëdhënieve ndërmjet Kosovës dhe Serbisë, është e vërtetë që ne i kemi zhvilluar. Gjermania bashkëpunoi intensivisht me Komisionin Evropian dhe Francën, të cilët dikur organizuan një përparim. Prandaj, nuk është për t’u habitur që ne qëndrojmë prapa propozimeve, të cilat janë rënë dakord dhe zhvilluar nga afër”, tha Scholz në një konferencë për shtyp pas Samitit BE-Ballkani Perëndimor në Tiranë.