Sezoni 2026 i Superligës Kineze nis me dënime të rënda për shumicën e ekipeve

Superliga Kineze e futbollit për sezonin 2026 pritet të nisë në mënyrë të pazakontë, pasi më shumë se gjysma e ekipeve do ta fillojnë kampionatin me pikë negative.

Këto penalizime janë vendosur si pasojë e shkeljeve të shumta të lidhura me korrupsionin, të cilat datojnë që nga viti 2012, shkruan IndeksOnline.

Sipas autoriteteve përkatëse të futbollit në Kinë, hetimet shumëvjeçare kanë zbuluar manipulime ndeshjesh, ryshfete, shkelje financiare dhe ndërhyrje të paligjshme në administrimin e klubeve.

Si rezultat, disa skuadra janë dënuar me zbritje pikësh që do të aplikohen që në javën e parë të sezonit të ri.

Shanghai Shenhua dhe Tianjin Jinmen Tiger nisin sezonin me –10 pikë, duke u vendosur që në start në zonën e rënies.
Ndërkohë, Qingdao Hainiu starton me –7 pikë, ndërsa Henan dhe Shandong Taishan me –6 pikë.

Dënime me –5 pikë kanë marrë gjithashtu Beijing Guoan, Shanghai Port, Wuhan Three Towns dhe Zhejiang, duke e bërë luftën për mbijetesë të ashpër që përpara se të luhet edhe një ndeshje e vetme.

Në kontrast të plotë, skuadrat si Chengdu Rongcheng, Chongqing Tonglianglong, Dalian Yingbo dhe Liaoning Tieren e nisin sezonin nga zero pikë, duke përfituar ndjeshëm nga penalizimet masive të rivalëve.

Federata Kineze e Futbollit ka deklaruar se këto masa janë të domosdoshme për të rikthyer integritetin, transparencën dhe besimin e publikut në futbollin vendas, duke theksuar se nuk do të ketë tolerancë ndaj korrupsionit, pavarësisht emrit apo historisë së klubit.

Sezoni 2026 pritet të jetë një nga më të pazakontët në historinë e Superligës Kineze./IndeksOnline/