Shakaja e Arnold Schwarzeneggerit për ish-gruan e tij dhe paratë që ajo i fitoi pas divorcit të tyre

Arnold Schwarzenegger bëri një referencë humoristike për ish-gruan e tij, Maria Shriver, gjatë ceremonisë së dhënies së yjeve në Hollywood Walk of Fame, ku gazetari Chris Wallace u nderua të enjten, më 18 shtator.

Aktori 78-vjeçar dhe ish-guvernatori i Kalifornisë e përshkroi Wallace, 77-vjeç si një “gazetar fantastik”, duke shtuar: “Unë di shumë për gazetarët. Kam dhënë, mund ta imagjinoni, mijëra intervista në jetën time. Por jo vetëm kaq, unë kam qenë i martuar me një gazetare”.

Pastaj ai komentoi me humor: “I vetmi ndryshim midis Chris dhe Maria është se Chris nuk mori kurrë gjysmën e parave të mia”, duke shkaktuar të qeshura nga publiku.

Arnold Schwarzenegger dhe Maria Shriver ishin të martuar për gati 25 vjet dhe kanë katër fëmijë, Katherine, Christina, aktorin e “White Lotus”, Patrick, dhe Christopher. Çifti u martua në prill të vitit 1986 dhe u divorcua në maj të vitit 2011, pas raportimeve për pabesinë e Arnold Schwarzenegger. Aktori më vonë pranoi se kishte një djalë, Joseph Baena, me ish-shërbyesen e familjes, Mildred “Patti” Baena. Divorci i tyre u finalizua në dhjetor të vitit 2021.

Sipas një dokumenti gjyqësor të siguruar nga Us Weekly në qershor 2022, si pjesë e zgjidhjes së divorcit, Maria Shriver ka të drejtë për gjysmën e të ardhurave të Arnold Schwarzeneggerit, përfshirë pensionin e tij, që nga dita kur u martuan deri në paraqitjen e divorcit.

Në një intervistë në maj 2023 me The Hollywood Reporter, aktori pranoi për divorcin e tij: “Ishte budallallëku im. Ishte dështimi im.” Pavarësisht ndarjes së tyre, ai theksoi: “Ne jemi miq vërtet të mirë dhe shumë të afërt. Jemi krenarë për mënyrën se si i rritëm fëmijët tanë. Pavarësisht dramës, kaluam Pashkët së bashku, Ditën e Nënës së bashku, Krishtlindjet së bashku, të gjitha ditëlindjet tona, gjithçka së bashku”. “Nëse do të kishte çmime “Oscar” për mënyrën se si të përballosh një divorc, unë dhe Maria duhet t’i fitonim ato për ndikimin më të vogël tek fëmijët”, shtoi ish-guvernatori i Kalifornisë.

Nga ana e saj, Shriver foli për ndarjen e saj pasi pabesia e Arnold Schwarzeneggerit u zbulua në librin e saj “Unë jam Maria”, botuar në prill. “Isha e mbytur nga pikëllimi dhe e shkatërruar nga konfuzioni, zemërimi, frika, trishtimi dhe ankthi. Nuk e dija më kush isha, ku i përkisja. Sinqerisht, ishte brutale dhe tmerruese”, shkroi ajo, duke vënë në dukje se lajmi erdhi menjëherë pas vdekjes së të dy prindërve të saj.

Ajo vazhdoi duke shkruar: “E ulur në dyshemenë e hotelit tim në errësirë, vetëm me lotët që më rridhnin në fytyrë, mendova: ‘Maria, ky nuk duhet të jetë fundi yt.’”