Shatri: Moskonstituimi i Kuvendit përbën pasoja në zhvillim ekonomik, rrezik për projektet e reja

 Ish ministri i Financave, Haki Shatri, në një prononcim për Indeksonline,  ka paralajmëruar për pasojat e rënda të moskonstituimit të Kuvendit të Kosovës, duke thënë se vendi tashmë po përballet me paralizë institucionale dhe se kjo do të përbëjë rrezik për buxhetin e vitit të ardhshëm.

 Institucionet të bllokuara për gati një vit Shatri tha se prej shpalljes së zgjedhjeve, Qeveria ka funksione të kufizuara dhe se në gjashtë muajt e fundit vendi është pa institucione të plota qeveritare.

“Çdo shoqëri e organizuar i ka institucionet që i shërbejnë zhvillimit të vendit dhe ngritjes së standardit jetësor. Ne nuk kemi më asnjë pengesë nga jashtë, por vetë po i bllokojmë institucionet që nga fillimi i vitit”, deklaroi ai.

Problemet me buxhetin sipas tijt, situata është veçanërisht e rrezikshme pasi po afrohet afati ligjor për dorëzimin e buxhetit në Kuvend.

 “Më 1 tetor buxheti duhet t’i dërgohet Kuvendit për shqyrtim e miratim. Kam dëgjuar se Ministria e Financave nuk ka kryer disa nga veprimet përgatitore, përfshirë qarkoret buxhetore. Kjo periudhë, korriku e gushti, është vendimtare për përcaktimin e kufijve buxhetorë për komunat dhe institucionet qendrore”, tha Shatri duke shtuar se varianti më i lehtë, por shumë i dëmshëm, është që viti i ardhshëm të vazhdojë me buxhetin e vitit paraprak.

 “Në atë rast mund të mbulohen vetëm pagat, pensionet dhe pagesat e rregullta ligjore, por jo politikat zhvillimore dhe masat nxitëse për zhvillim ekonomik. Praktikisht vendi do të jetë si një anije pa timon”, tha Shatri.

Shatri po ashtu ka theksuar se paraliza institucionale ka ndikuar drejtpërdrejt edhe në investime.

 “Në gjashtëmujorin e parë janë realizuar vetëm 40 milionë euro investime, ndërkohë që buxheti i paraparë për investime kapitale është 912 milionë euro.

 Pra, vetëm një e katërta e mjeteve të investimeve janë shfrytëzuar”, tha Shatri, duke shtar se niveli lokal ka arritur të realizojë gjysmën e investimeve të parapara, niveli qendror ka investuar vetëm 138 milionë euro në gjashtë muaj, gjë që sipas tij është tepër e ulët.

Ai po ashtu tha se ka stagnim të theksuar edhe në sektorin privat, ku  investimet private po shkojnë kryesisht në patundshmëri, gjë që nuk sjell zhvillim ekonomik afatgjatë./Indeksonline/