SHBA i ofron Iranit marrëveshje të re bërthamore me pasurim të kufizuar uraniumi

Administrata e presidentit Trump i ka paraqitur Iranit një propozim të ri për marrëveshje bërthamore, që lejon pasurimin e kufizuar të uraniumit në tokën iraniane për qëllime civile, një kthesë që bie ndesh me deklaratat publike të zyrtarëve amerikanë, raportoi Axios.

Sipas burimeve me njohuri të drejtpërdrejtë për dokumentin, propozimi lejon Iranin të ruajë disa kapacitete pasurimi në impiantet mbitokësore, të kufizuara në përqindje të ulët dhe të monitoruara nga Agjencia Ndërkombëtare për Energjinë Atomike (IAEA). Ndërkohë, impiantet nëntokësore do të bëhen jofunksionale për një periudhë të caktuar.

Në kundërshtim me deklaratat e dërguarit të Shtëpisë së Bardhë Steve Witkoff dhe Sekretarit të Shtetit Marco Rubio, të cilët kërkuan pasurim zero dhe çmontim të plotë të programeve bërthamore iraniane, propozimi aktual ofron më shumë fleksibilitet dhe lëshime për Teheranin.

Megjithatë, marrëveshja parasheh kufizime të rrepta teknologjike, ndalim të kërkimit të avancuar mbi centrifugat dhe një regjim të fortë inspektimesh ndërkombëtare. Lehtësimi i sanksioneve do të jetë i kushtëzuar me përmbushjen e standardeve të transparencës dhe angazhimit të vërtetë nga ana e Iranit.

Zëdhënësi i Ministrisë së Jashtme iraniane, Esmaeil Baghaei, konfirmoi se Irani ende po e shqyrton ofertën dhe theksoi mungesën e garancive të mjaftueshme për heqjen e sanksioneve. Ndërkohë, kryeministri izraelit Benjamin Netanyahu është paralajmëruar të mos ndërmarrë veprime që mund të dëmtojnë procesin, mes frikës në SHBA se Izraeli mund të godasë ushtarakisht objektet bërthamore të Iranit.

Një raund i gjashtë bisedimesh mes palëve pritet të mbahet në ditët në vijim.