Shitjet e Tesla-s bien në Evropë më 2025, por arrijnë rekorde në Norvegji
Shitjet e makinave Tesla (TSLA.O) ranë në disa tregje evropiane në dhjetor, duke reflektuar tkurrjen e pjesës së tregut të kompanisë amerikane në rajon gjatë vitit 2025, megjithatë ato arritën nivele rekord në Norvegji, vend i njohur për përqindjen e lartë të makinave elektrike.
Shitjet e markës së Elon Musk në Evropë kanë ngadalësuar që nga fundi i vitit 2024, për shkak të konkurrencës në rritje, vjetërsimit të gamës së makinave dhe reagimeve negative ndaj lavdërimeve të Musk ndaj figurave politike të së djathtës evropiane, shkruan Reuters, transmeton Dukagjini.
Tesla raportoi gjithashtu një rënie më të theksuar se sa pritej në numrat e dërgesave globale për tremujorin e katërt, çka shkaktoi një rënie prej 1.5% të aksioneve të saj.
Pavarësisht lançimit të versioneve më të lira të Modeleve Y dhe 3 në Evropë, biznesi i Tesla-s nuk është rikuperuar ende.
Në Francë, tregu i tretë më i madh evropian për makina pas Gjermanisë dhe Britanisë, regjistrimet e Tesla-s ranë 66% në dhjetor, në 1,942 makina, sipas të dhënave të PFA-së. Për vitin 2025 në total, regjistrimet ranë 37%.
Në Suedi, regjistrimet ranë 71% në dhjetor në 821 makina, duke sjellë një rënie 70% për 2025, sipas Mobility Sweden.
Shitjet ranë gjithashtu në Portugali, Spanjë dhe Belgjikë: përkatësisht 13% në 1,207 makina, 44% në 1,794 dhe 28% në 1,084 makina. Për vitin 2025, rëniet ishin 22% në Portugali, 4% në Spanjë dhe 53% në Belgjikë.
Nga ana tjetër, regjistrimet e Tesla-s u rritën në Itali dhe Zvicër në dhjetor: 85% në 2,519 makina dhe 76% në 1,570 makina, por për vitin 2025 ranë përkatësisht 18% dhe 28%.
Norvegji – gati të gjitha makinat e reja janë elektrike
Në Norvegji, regjistrimet e Tesla-s u rritën 89% në dhjetor, në 5,679 makina. Pjesa e tregut të Tesla-s arriti mbi 19% për vitin 2025, duke vendosur një rekord të ri vjetor dhe përfituar nga fakti që pothuajse të gjitha makinat e reja të Norvegjisë janë elektrike.
Deri në nëntor, pjesa e tregut të Tesla-s në Evropë, Britani dhe Shoqatën Evropiane të Tregtisë së Lirë (EFTA) ishte ulur në 1.7% nga 2.4% një vit më parë, edhe pse shitjet totale të makinave plotësisht elektrike përbënin 18.8% të tregut, sipas lobby-t të industrisë evropiane ACEA.
ACEA do të publikojë të dhënat për shitjet vjetore në Evropë më vonë gjatë janarit. Në tetë vendet që raportuan të premten, të cilat përbëjnë më shumë se gjysmën e tregut evropian të Tesla-s, regjistrimet ranë në total rreth 25% për vitin 2025.
