Shpërtheu ndaj Alonsos, Reali merr vendim për Viniciusin

Pavarësisht tensioneve të fundit dhe reagimit të tij të ashpër ndaj trajnerit Xabi Alonso, Real Madridi nuk ka në plan ta shesë Vinicius Junior.

Sipas gazetarit Dean Jones, incidenti i ndodhur gjatë El Clasicos, kur braziliani u zëvendësua në fitoren 2-1 ndaj Barcelonës dhe u kap nga kamerat duke thënë “Gjithmonë unë! Po largohem nga skuadra!”, ka ndezur spekulime të shumta mbi të ardhmen e tij.

Megjithatë, burime pranë klubit kanë theksuar se “nuk ekziston asnjë plan për shitjen e tij”. Edhe pse në fund të sezonit Vinicius do të ketë vetëm një vit të mbetur në kontratë dhe bisedimet për rinovim nuk kanë përparuar, drejtuesit madrilenë e konsiderojnë atë pjesë të rëndësishme të projektit afatgjatë.

Liverpooli është përmendur si klub i interesuar, por për momentin këto raportime janë cilësuar si “të parakohshme”.

Klubi madrilen shpreson që lojtari të vazhdojë të luajë një rol kyç në garën për rikthimin e titullit të La Ligas, ndërsa një transferim në janar konsiderohet plotësisht i përjashtuar.