“Shpërthimet ndiheshin si tërmete”- Babai i 5 fëmijëve flet për sulmet izraelite në Gaza ku dyshohet se u vranë 60 persona

Autoritetet shëndetësore të drejtuara nga Hamasi kanë thënë se gati 60 persona janë vrarë në sulmet e reja izraelite në Gaza, ndërsa banorët raportuan bombardime të rënda.

Sipas mediave të huaja, ushtria izraelite lëshoi ​​të hënën urdhra evakuimi për njerëzit në zona të mëdha të veriut, duke çuar në zhvendosje të mëtejshme.

Zyrtarët izraelitë pritet të mbërrijnë në Uashington për një përpjekje të re për një armëpushim të promovuar nga administrata e Trumpit.

Salah, një 60-vjeçar baba i pesë fëmijëve nga qyteti i Gazas, sipas Reutersit tha: “Në lajme dëgjojmë se një armëpushim është afër, në terren shohim vdekje dhe dëgjojmë shpërthime”.

“Shpërthimet nuk u ndalën kurrë; ata bombarduan shkolla dhe shtëpi. Ndiheshin si tërmete”, vijoi ai më tej, shkruan A2 CNN-i.

Autoritetet shëndetësore thanë se 10 persona u vranë në Zeitoun dhe të paktën 13 u vranë në jugperëndim të qytetit të Gazas.

Mjekët thanë se shumica e atyre 13 personave u goditën nga armë zjarri, por banorët raportuan edhe një sulm ajror.

Ata thanë gjithashtu se 20 persona, përfshirë gra, fëmijë dhe një gazetar vendës, u vranë në një sulm ajror izraelit në një kafene buzë plazhit në qytetin e Gazas.

IDF-ja urdhëroi njerëzit të shkonin në jug, duke thënë se planifikonte të luftonte militantët e Hamasit që vepronin në Gazan Veriore, përfshirë zemrën e qytetit të Gazas.

Donald Trump i ka kërkuar Izraelit dhe Hamasit të bien dakord për një armëpushim, pasi numri i palestinezëve të vrarë në Gaza arriti në 56,500, sipas Ministrisë së Shëndetësisë të drejtuar nga Hamasi, e cila nuk bën dallim midis civilëve dhe luftëtarëve në numërimin e saj.

“BËJENI MARRËVESHJEN NË GAZA. KTHEJINI PENGJET!!!”, shkroi ai në rrjetet sociale të dielën.