S’ka rehati as për pushuesit në Dubai, Ambasada e Kosovës del me njoftim pas zhvillimeve të fundit

Rritja e tensioneve ka shtyrë Ambasada e Republikës së Kosovës në Abu Dhabi të dalë me një njoftim zyrtar për të gjithë shtetasit e Kosovës që ndodhen në Dubai dhe në pjesë të tjera të Emiratet e Bashkuara Arabe.

Në reagimin e saj, Ambasada paralajmëron se për shkak të zhvillimeve të fundit ekziston rrezik i shtuar për përshkallëzim të situatës, çka mund të sjellë ndërprerje të udhëtimeve dhe ndikime të tjera të paparashikuara.

Për këtë arsye, u bëhet thirrje të gjithë shtetasve të Kosovës që jetojnë, punojnë apo po qëndrojnë për pushime në Emiratet e Bashkuara Arabe:

• Të informohen rregullisht përmes burimeve zyrtare dhe mediave;
• Të ndjekin me përpikëri udhëzimet e autoriteteve vendore;
• Të shmangin zonat pranë objekteve të sigurisë dhe atyre ushtarake.

Ambasada ka bërë të ditur se po e monitoron situatën në vazhdimësi dhe do të njoftojë për çdo zhvillim të ri.

Për raste urgjente, shtetasit e Kosovës mund të kontaktojnë në numrin emergjent të Ambasadës në Abu Dhabi:
+971 54 709 2109./IndeksOnline/