Skënder Hyseni nga Amerika: Nuk lejojmë që të prishet partneriteti me ShBA-në

Anëtari i Kryesisë dhe Sekretari për Marrëdhënie Ndërkombëtare të LDK-së, Skender Hyseni sot ka qëndruar në Shtëpinë e Bardhë në Washington.

Hyseni tha se në Shtëpinë e Bardhë u prit nga i Dërguari i Posaçëm i presidentit Donald Trump, ambasadori Richard Grenell.

Tutje Hyseni theksoi se Grenell ka kërkuar me ngulm heqjen e menjëhershme dhe pakushte të taksës 100% ndaj mallrave serbe, në mënyrë që t’i hapet rrugë dialogut Kosovë-Serbi, transmeton Indeksonline.

Hyseni ritheksoi se LDK kurrë s’do të lejojë që partneriteti me Amerikën të prishet dhe se tashmë e siguroi ambasadorin Grenell se për LDK-në dhe popullin e Kosovës, partneriteti me ShBA-në është i shenjtë.

Njoftimi i plotë:

 Me autorizimin e Kryetarit të Lidhjes Demokratike të Kosovës Isa Mustafa, sot, në cilësinë e anëtarit të Kryesisë dhe Sekretarit për Marrëdhënie Ndërkombëtare të LDK-së,  u prita në Shtëpinë e Bardhë në Washington nga i Dërguari i Posaçem i Presidentit Trump, Ambasadori Richard Grenell.

Gjatë një takim të gjatë dhe shterrues, bisedën e përqëndruam në aspekte të veçanta të zhvilimeve në Kosovë dhe rajon.

I përkushtuar fuqishëm për të çuar Kosovën dhe rajonin përpara drejt një zhvillimi dinamik ekonomik, Shtëpia e Bardhë dhe Ambasadori Grenell kërkojnë me ngulm heqjen e menjëhershme  dhe pa kushte të tarifës ndaj mallrave nga Serbia, që t’i hpaet rrugë dialogut Kosovë-Serbi i cili duhet dhe do të përmbyllet me njohje të ndërsjellë.

Amerika është aleat i palëkundshëm i Kosovës dhe popullit të saj dhe mbetet fuqishem e përkushtuar ndaj interesave jetike të saj.

Por, Amerika nuk mund ta mbrojë Kosovën nga vetvetja, përkatsisht nga sjelljet e papërgjegjshme të Qeverisë dhe liderëve të saj, ishte mesazhi i Ambasadorit Grenell, duke shtuar se Amerika nuk mund të vazhdojë të shpenzojë qindra miliona dollarë për ushtri dhe ndihma e projekte tjera në një vend ku qeveria punon kundër interesave të qytetarëve të saj.

E sigurova Ambasadorin Grenell se për LDK-në dhe popullin e Kosovës, partneriteti strategjik dhe miqësia e veçantë me SHBA-të janë të shenjta dhe të pazëvendësueshme.

LDK kurre nuk do te lejojë qe ky partneritet të prishet.

LDK mbetet e përkushtuar dhe e vendosur që të koordinohet dhe harmonizohet ngushtë me SHBA-të në çdo fushë.

LDK pajtohet dhe mbron qendrimin që tarifa të hiqet menjëhere dhe pa kushte, ashtu siq kërkohet nga Presidenti Trump.

Partneriteti me Amerikën nuk ka alternative.

Skender Hyseni