Sllovenia drejt tërheqjes së plotë nga Eurovizioni 2026, pritet të mos e transmetojë as garën

Sllovenia shumë mund të mos jetë pjesë e Eurovizionit 2026 dhe, sipas draftit më të fundit të Planit të Prodhimit për vitin e ardhshëm të RTV SLO, televizioni publik slloven nuk parashikon as pjesëmarrje me artist, as delegacion, madje as transmetim të konkursit për publikun vendas. Vendimi, edhe pse ende jo zyrtar, po konsiderohet gjerësisht si shumë i mundshëm nga mediat në Slloveni.

Sipas planit, e njëjta qasje vlen edhe për Eurovision Junior, duke e bërë të qartë se tërheqja synon të jetë e plotë.

Pse po largohet Sllovenia?

Burimet e brendshme të RTV SLO theksojnë dy arsye kryesore:

Pjesëmarrja e Izraelit në konkurs
Një pjesë e madhe e stafit dhe publikut slloven kundërshton vijimin e pjesëmarrjes në një garë ku merr pjesë Izraeli, një qëndrim i artikuluar prej muajsh. Në anën tjetër, televizioni publik izraelit KAN deklaron se Eurovizioni është një ngjarje kulturore dhe nuk duhet të ndikohet nga tensionet politike.

Kufizimet financiare

RTV SLO ka parashikuar buxhet më të ulët për programe argëtimi gjatë vitit 2026, duke dhënë përparësi ngjarjeve të mëdha sportive që kërkojnë investim të gjerë teknik dhe financiar.

Nëse vendimi konfirmohet, 2026 do të jetë një nga vitet më të rralla kur një shtet evropian jo vetëm që nuk merr pjesë, por as nuk transmeton festivalin më të madh muzikor në kontinent. Fansat e Eurovizionit në Slloveni, ndërkohë, presin njoftimin zyrtar.  /kultplus