Sonte pritet arritja e afganëve në Kosovë

Indeksonline në vazhdimësi ka raportuar për të rejat e fundit se kur pritet të arrijnë afganët në Kosovë.

Tani, burimet e Indeksonline bëjnë të ditur se, rreth 100 afganë pritet të arrijnë sonte në Kosovë rreth orës 20:30.

Ata do të arrijnë në Kosovë përmes Aeroportit Ndërkombëtar të Prishtinës “Adem Jashari”.

Kujtojmë që ministri i Punëve të Brendshme, Xhelal Sveçla kishte thënë se në Kosovë priten të vijnë rreth 2 mijë shtetas afganë.

Sveçla bëri të ditur se qëndrimi i personave që do të vijnë nga Afganistani nuk do të jetë i gjatë dhe, siç u shpreh ai, Kosova mund t’u ofrojë atyre mbrojtje të përkohshme në kohëzgjatje prej një viti.

“Ne jemi duke biseduar me partnerët tanë për të parë nevojat e afganëve për strehim dhe pastaj për të kalkuluar edhe potencialin apo mundësitë e shtetit të Kosovës për t’i strehuar ata. Numri për të cilin po flasim, dhe gjithmonë po flasim për strehim të përkohshëm, është diku rreth 2.000”, u shpreh Sveçla./Indeksonline/