Spitali i Gjakovës: Pacientja që vdiq dje ishte qe tre vjet në gjendje komatoze
Spitali i Gjakovës “Isa Grezda” ka reaguar pas vdekjes së një gruaje gjatë së premtes në këtë qytet, ku sipas shqetësimit të ngritur nga bashkëjetuesi i saj dyshohet për trajtim të pandërgjegjshëm mjekësor.
Këto akuza janë mohuar nga institucioni shëndetësor.
Sipas spitalit, pacientja M.R. ka qenë në gjendje komatoze për më shumë se tre vite dhe gjatë kësaj periudhe ka qenë e shtrirë në Kujdes Intensiv Qendror, duke marrë trajtim të vazhdueshëm profesional.
“Për tri vite me radhë, pacientja është trajtuar nga mjekët dhe infermierët e kujdesit intensiv, në përputhje të plotë me protokollet mjekësore të aplikueshme për raste të tilla”, thuhet në reagimin e tyre në facebook.
Spitali theksoi se personi që ka bërë denoncimin nuk është familjar i pacientes, ndërsa deklaratat e tij i cilëson si tentativë të qëllimshme për të njollosur punën e stafit mjekësor.
“Deklaratat e tij nuk përputhen me faktet dhe paraqesin tentativë të qëllimshme për të njollosur punën e stafit mjekësor, i cili për tri vite ka ofruar kujdes të pandërprerë, profesional dhe të përgjegjshëm.
Edhe pse Kujdesi Intensiv operon me rregulla strikte për vizitorët, për shkak të ndjeshmërisë së rastit janë bërë tolerime të kontrolluara, dhe familjarët kanë qenë të pranishëm në Kujdes Intensiv Qendror gjatë gjithë kohës sa ka jetuar pacientja.
Nuk është detyrë e jona të hyjmë në çështje të brendshme familjare dhe askush nuk mund të përfitojë duke shpifur apo duke manipuluar opinionin me deklarata të pavërteta.
Kërkojmë që organet kompetente, Inspektorati Shëndetësor, Policia dhe Prokuroria, ta trajtojnë rastin me seriozitet dhe të mos lejojnë baltosjen e punës së punëtorëve shëndetësorë për interesa personale të askujt”, deklaroi Spitali në Gjakovë.
