Sqarohet Gjykata e Apelit për rastin e Darko Tasiq

Banorët e Krushës së Madhe dhe asaj të Vogël kanë protestuar para Pallatit të Drejtësisë në Prishtinë, duke shprehur revoltën e tyre për uljen e dënimit ndaj të dënuarit për krime lufte, serbit Darko Tasiq.

E për këtë ka reaguar Gjykata e Apelit, duke thënë se ai nuk ishte i ngarkuar as për vrasje, as për rrahje apo çfarëdo torture ndaj popullsisë civile, ashtu sikur mund të flitet.

Sipas një reagimi të saj, kjo gjykatë është për të bërë drejtësinë në përputhje me Kushtetutën dhe ligjet e Republikës së Kosovës, pa dallime kombëtare, racore, etnike a fetare dhe larg çfarëdo paragjykimi.

Sqarimi i plotë:

Gjykata e Apelit ka përcjell më vëmendje reagimet dhe shqetësimet që kanë ardhur pas publikimit të vendimit të kësaj gjykate,  lidhur më rastin e të akuzuarit për krime lufte D.T.

Duke parë kritikat e shumta dhe paqartësitë e krijuara rreth këtij rasti, e me qëllim të informimit të drejtë të opinionit publik, kjo gjykatë e ndjen të nevojshme të japë këtë sqarim:

I akuzuari D.T. ngarkohet nga Prokuroria Speciale për dy vepra penale Krime lufte kundër popullatës civile nga neni 142 i Ligjit Penal të Jugosllavisë (LPJ) dhe Kodit Penal të Republikës së Kosovës (KPRK), neni 152.

Vepra e parë të akuzuarin e ngarkonte për plaçkitjen e sendeve të luajtshme. Vepra e dytë e ngarkonte për përdhosjen e kufomave që kategorizohet si veprim kundër dinjitetit njerëzor, e cila kategorizohet vetëm si veprim në protokollin 2 të Konventës së Gjenevës, por nuk parashihet si vepër e veçantë në kuadër të nenit 142 të LPJ-së, prandaj nuk mund të qëndrojë si vepër e veçantë.

Është më rendësi të dihet se dënimi maksimal i paraparë me ligj është 20 vjet, sipas Ligjit Penal të Jugosllavisë, ngase ai ligj ishte në fuqi në kohën e kryerjes së veprës penale dhe si i tillë edhe sipas Kushtetutës së Kosovës, duhet zbatuar ai ligj se është më i favorshëm për të akuzuarin.

Në rastin konkret, gjykata e shkallës së parë kishte shqiptuar dënim përtej maksimumit të dënimit të paraparë me ligj, ndërsa nga ana tjetër prokuroria nuk ka të drejtë as kushtetuese e as ligjore që ta ngarkojë dikë me akuzë sipas ligjit më të pafavorshëm për të.

Po ashtu është obligim ligjor që gjatë matjes se dënimit, gjykata duhet të ketë parasysh minimumin dhe maksimumin e dënimit të paraparë për atë vepër penale, pastaj duhet të merr parasysh qëllimin e dënimit, parimet e përcaktuara në kod si dhe rrethanat lehtësuese dhe rënduese në raport me veprën penale dhe të akuzuarin. Theksojmë se i akuzuari D.T. nuk ishte i ngarkuar as për vrasje, as për rrahje apo çfarëdo torture ndaj popullsisë civile, ashtu sikur mund të flitet, por vetëm për veprat që u theksuan më sipër.

Gjykata e Apelit, mirëkupton gjykimin kritik të pales së demtuar, por  kujton se është për të bërë drejtësi, në përputhje me Kushtetutën dhe ligjet e Republikës së Kosovës, pa dallime kombëtare, racore, etnike a fetare dhe larg çfarëdo paragjykimi.

Për më shumë detaje, po jua përcjellim aktgjykimin e plotë (të redaktuar për publikun), të cilin e gjeni në linkun në vijim. Ndersa palëve do t’u procedohet në perputhje me ligjin.