Sulmi ndaj sigurimit të “Zone Club”, policia jep detaje si ndodhi rasti

Mëngjesin e djeshëm mediat raportuan se kishte ndodhur një vrasje në tentativë në Prishtinë.

U përfol se cak i kësaj vrasjeje ishte sigurimi i “Zone Club”, pasi nuk kishte lejuar hyrjen e disa personave në diskotekë.

Arsyen për ngjarjen në fjalë e ka mohuar shefi i sigurimit të “Zone Club”, Valdrin Ramosaj.

Ramosaj deklaroi dje për Indeksonline se rasti kishte ndodhur për motive private dhe se hyrja në “Zone Club” nuk ishte “mollë e sherrit”.

Madje, sipas Ramosajt, sulmi nuk ka ndodhur pranë “Zone Club” por të vendi i ashtuquajtur “Rrethi i Ismetit”.

Ndërkohë, policia ka ndarë detaje se si ka ndodhur ngjarja.

Sipas policisë, ngjarja ka ndodhur rreth orës 02:45, atëherë dhe kur pati të shtëna me armë zjarri.

Të shtënat kishin ardhë nga një veturë pa targa, të cilën e drejtonte një i dyshuar.

Nga vendi i ngjarjes janë gjetur dhe konfiskuar dy gëzhoja, të cilat dyshohen të jenë të armës AK-47, si dhe vetura e viktimës, e cila ishte qëlluar nga dorasi.

“Viktima është dërguar për tretman mjekësor në QKUK dhe më pas është liruar” thuhet në raportin policor.

Rasti u inicua si “Vrasje në tentativë” dhe është duke u hetuar nga njësitet relevante.