Supremja mohon zvarritjet në trajtimin e ankesave për paraburgim

Gjykata Supreme e Kosovës i ka reaguar Odës së Avokatëve të Kosovës, e cila ka ngritur shqetësimin lidhur me, siç ka thënë, zvarritjet e vazhdueshme në trajtimin e ankesave kundër vendimeve me të cilat caktohet apo vazhdohet masa e paraburgimit.

Në reagimin e Supremes thuhet se pas verifikimeve të kryera, “pretendimet për zvarritje sistematike në shqyrtimin e paraburgimeve, rezultojnë të pavërteta”.

“Çështjet që kanë të bëjnë me caktimin apo vazhdimin e masës së paraburgimit trajtohen me urgjencë dhe prioritet të lartë dhe shqyrtohen brenda afateve të përcaktuara me kodin e procedurës penale, si edhe në përputhje me standardet dhe dispozitat ndërkombëtare që garantojnë mbrojtjen e lirisë personale dhe procesin e rregullt ligjor”, thuhet në reagim.

Në reagim thuhet se nëse Oda e Avokatëve e Kosovës i referohet ndonjë rasti konkret, ku pretendohet se ka pasur tejkalim të afateve ligjore apo vonesa të pajustifikuara, ftohet që t’i adresojë të dhënat te kryetari i gjykatës.

Në reagimin e Odës së Avokatëve të Kosovës të bërë të hënën thuhej në praktikë vërehen vonesa të konsiderueshme në shqyrtimin dhe dorëzimin e vendimeve nga instancat më të larta gjyqësore.

“Në jo pak raste, vendimet e Gjykatës së Apelit pranohen nga palët pas kalimit të disa javëve, madje ka raste kur masa e paraburgimit vazhdohet sërish nga gjykata e shkallës së parë, ndërsa pala ende nuk e ka pranuar vendimin e Apelit lidhur me vendimin paraprak. Zvarritje edhe më të theksuara raportohen në procedurat pranë Gjykatës Supreme”, thuhet në reagimin e OAK-së.