Syla: Varianti i ri i Covid-19 më vulgar – tubimet elektorale vatra infeksioni

Simptomat e varianti të ri të Covidit-19 janë me vulgare, thotë Blerim Syla, kryetar i Federatës Sindikale të Shëndetësisë, duke shtuar se tubimet elektorale janë vatër infeksioni.

Syla tha se dy anesteziologët, të cilët janë riinfektuar, nuk janë në gjendje aspak të mirë.

“Po në fakt po është e vërtetë që janë shfaqur rastet e para të riinfektimit jo vetëm te punëtorët shëndetësorë, por në këtë rast po flasim për punëtorët shëndetësorë. I kemi dy mjekë anesteziologë, të cilët për fat të keq janë riinfektuar dhe gjendja e tyre është si është, kjo është mjaft shqetësuese, sepse faktikisht po hymë në një fazë të panjohur, kështu ashtu ka qenë një virus i panjohur dhe me të vërtetë kjo të atakojë punëtorët shëndetësorë është shumë shqetësuese”, tha ai. Ai tregon që sipas informatave që kanë, simptomat nga riinfektimi janë shumë më të ashpra dhe vulgare, duke shpresuar që të mos përfundojnë me fatalitet. “Po në fakt unë nuk jam ekspert i fushës, unë jam gjinekolog, mirëpo sipas informatave që i marrim nga Infektivi, po është e vërtetë që është pak më vulgare, simptomat janë më të ashpra dhe në fakt po shpresojmë që nuk përfundojnë edhe me fatalitet më të rëndë, mirëpo është një situatë mjaft e rëndë te këta pacientë që riinfektohen. Se cila është natyra dhe shkaku unë mundem me fol vetëm për punëtorët shëndetësorë, sipas statistikave të fundit punëtorët shëndetësorë janë të eksponuar katër deri në pesë herë më shumë sesa popullata tjetër ndaj virusit, pra mundeni me marrë me mend ne jemi të rrezikuar katër deri në pesë herë, i keni parë edhe mutacionet e tjera që vjen riinfektimi”, deklaroi ai. Midis tjerash, doktor Syla tha se shqetësimi më i madh janë kapacitetet e vendit për detektimin e variantit të ri.

“Në fakt shqetësimin më të madh e kemi së pari se si do t’i kemi kapacitetet për detektimin e variantit të ri. Ju e dini që variantet e para janë hulumtua në Gjermani dhe tashmë i kemi rastet e para në Kosovë, të detektuara, nuk e dimë sa kemi raste të reja të pa detektuara. Mirëpo shpresoj që Instituti… shumë shpejt të veprojë dhe t’i detektojë rastet e tjera. Se sa është ky virus i dytë tashmë dihet edhe botërisht edhe shkencërisht që përhapet shumë shpejt dhe i ka simptomat dhe vdekshmërinë më të madhe, nëse me 100 mijë banorë në Angli ka pasur dhjetë vdekje, tashti me këtë variant të ri janë 13 deri në 15 vdekje dhe, edhe njëherë po them përhapja është shumë më e shpejtë dhe më e lehtë”, u shpreh ai.

Lidhur me tubimet e partive politike, gjatë fushatës elektorale, Syla tha që kemi bërë vazhdimisht apel që të shmangen ato tubime, sepse sipas tij ato janë vatra e virusit.“Para disa dite, jo vetëm Federata Sindikale e Shëndetësisë kanë bërë apel më të sinqertë të mundshëm, mirëpo ka dalë mandej edhe Instituti Kombëtar… e të tjerë që kanë bërë apele, i keni parë së fundmi me të vërtetë është jo serioze dhe këta njerëz po e dërgojnë popullatën drejtë infeksionit, kush do të merret mandej me të, me siguri një sistem çfarë e kemi ne. Mirëpo duke ia shtuar kësaj që edhe një staf i cili është i stërlodhur, kanë rënë edhe qëndrimet, kanë rënë edhe të gjitha ato që duhet t’ishin prezente, atëherë këta duhet o t’i thërrasin mendjes, o le të përgatiten për më të keqen. Nuk dëshiroj as të përhap panik, mirëpo vetë këto tubime që po i shohim nëpër rrugë, nëpër sallat e dasmave, nëpër oda, me të vërtetë janë vatër e infeksionit, vatër që virusi vetëm e pret dhe e dëshiron”, përfundoi ai.