Tashmë 2 muaj negociata, ende pa marrëveshje LVV-LDK

Sot janë bërë dy muaj ç’prejse janë mbajtur zgjedhjet e parakohshme parlamentare, por partia fituese e zgjedhjeve, LVV-ja, ende nuk ka arritur marrëveshje për bashkëqeverisje me LDK-në.

Derisa nga Vetëvendosja kanë thënë se për presidentin nuk duhet të flitet njëherë, nga LDK-ja këmbëngulin se kjo pozitë duhet t’u takojë atyre, shkruan sot gazeta “Zëri”.

Lidhja Demokratike e Kosovës (LDK) po vazhdon të insistojë se marrëveshja me Vetëvendosjen duhet të jetë e baraspeshuar. Zyrtarët e këtij subjekti thonë se me marrëveshjen finale LDK-së duhet t’i takojë pozita e kryeparlamentarit dhe ajo e presidentit.

Vetëm kështu, sipas LDK-së, mund të arrihet marrëveshja përfundimtare për formimin e Qeverisë së ardhshme.

Në të kundërtën, po qe se Vetëvendosja nuk do që t’i japë këto dy pozita, sipas zyrtarëve të LDK-së, Vetëvendosje mund ta japë postin e kryeministrit dhe ta mbajë për vete pozitën e kryetarit të Kuvendit dhe atë të presidentit.