Të dhënat: Rritet transporti hekurudhor dhe ajror në Kosovë

Agjencia e Statistikave të Kosovës ka publikuar raportin mujor të transportit dhe telekomunikimit për shtator 2025, i cili tregon rritje të dukshme në transportin ajror, hekurudhor dhe në sektorin e telefonisë mobile, ndërsa shihet një rënie e lehtë në trafikun e telefonisë fikse.

Transporti Ajror: Më shumë fluturime dhe më shumë udhëtarë

Gjatë shtatorit 2025 janë realizuar 1,196 fluturime, që paraqet një rritje prej 7,3% krahasuar me shtatorin 2024.

Numri total i udhëtarëve ka arritur në 374,982, duke shënuar një rritje prej 8,9% në raport me vitin paraprak.

Udhëtarë në ardhje kanë qenë 165,570 (+8,8%), ndërsa ata në shkuarje 209,412 (+9,0%).

Transporti Hekurudhor: Rritje e madhe e udhëtarëve

Në sektorin hekurudhor, gjatë shtatorit 2025 janë regjistruar 8,218 udhëtarë, një rritje prej 59,5% krahasuar me shtatorin 2024.
Ndërkohë, transporti i mallrave ka qenë zero për këtë muaj.

Telefonia Fikse: Rritje minimale e përdoruesve, rënie e trafikut

Numri i përdoruesve të rrjetit telefonik fiks ka arritur në 68,091, një rritje shumë e lehtë prej 0,1% krahasuar me periudhën e njëjtë të vitit të kaluar.
Megjithatë, trafiku i realizuar në këtë rrjet ka rënë në 1,962,842 minuta, që përfaqëson një ulje prej 2,2%.

Telefonia Mobile: Rritje në përdoruesit Prepaid dhe Postpaid

Sektori i telefonisë mobile ka vazhduar rritjen ku përdoruesit me parapagim (Prepaid): 1,682,992,  (+0,38%), ndërsa përdoruesit me kontratë (Postpaid): 321,338 (+3,26%)./

Të dhënat tregojnë një rritje të vazhdueshme të mobilitetit të qytetarëve, veçanërisht në transportin ajror dhe përdorimin e telefonisë mobile, ndërsa shërbimet fikse të komunikimit mbeten në rënie të lehtë. ASK do të vazhdojë monitorimin periodik për të pasqyruar trendet e zhvillimit në këta sektorë.