Teatrot e Kosovës bashkojnë forcat për showcase-in teatror 2019

Teatri Kombëtar i Kosovës, teatri “Adriana” nga Ferizaj, Teatri i Gjilanit dhe Qendra Multimedia nga Prishtina kanë nënshkruar dje një ‘memorandum bashkëpunimi’, me të cilin zotohen që të angazhohen bashkërisht në organizimin e edicionit të sivjetshëm të Kosovo Theater Showcase 2019, që sivjet do të mbahet nga 31 tetori deri më 4 nëntor 2019.

Në këtë edicion pritet të prezentohen së paku 6 shfaqje të prodhuara nga teatrot nënshkruese të këtij memorandumi. Edicioni i sivjetshëm i showcase-it 2019 pritet të sjellë në Kosovë rreth 50 kritikë teatri, gazetarë, selektorë festivalesh e  e admiruesë të teatrit nga vende të ndryshme të botës.

Përveq Prishtinës, showcase do të zhvillohet edhe në qytete të tjera të Kosovës. Në këtë mënyrë, mysafirët ndërkombëtarë do të kenë mundësi të rrallë për të parë jo vetëm tendencat më të fundit të skenës së teatrit të Kosovës, por edhe të shijojnë mikpritjen e madhe dhe peizazhin e bukur të Kosovës. Ky edicion, gjithashtu do të sjellë disa programe plotësuese; diskutime, panele dhe mbrëmje muzikore.

Memorandumin e kanë nënshkruar drejtori i Teatrit Kombëtar të Kosovës, Agim Sopi, drejtori i teatrit “Adriana”, Fatmir Hyseni, drejtori i Teatrit të Gjilanit, Erson Zymberi dhe drejtori i Qendrës Multimedia, Jeton Neziraj.

Kosovo Theater Showcase 2019 është pjesë e platforms kulturore “Platforma Kulturore e Kosovës 2019 +”.