Tensioni në Lindje të Mesme e vendos në krizë tregun e naftës

Sipas një analize të publikuar nga Reuters, përshkallëzimi i konfliktit me Iran ka zhytur tregun global të naftës në një nga krizat më të rënda të dekadave të fundit, duke rritur ndjeshëm pasigurinë për furnizimet energjetike botërore.

Sulmet e ndërmarra nga Shtetet e Bashkuara dhe Izraeli ndaj objektivave iraniane, si dhe reagimi i Teheranit me kundërsulme, kanë përshkallëzuar tensionet në Gjirin Persik — një nga rajonet më të rëndësishme për prodhimin dhe eksportin e naftës në botë.

Analistët paralajmërojnë se çdo përshkallëzim i mëtejshëm mund të rrezikojë drejtpërdrejt rrjedhën e furnizimeve globale.

Vëmendja e tregjeve është përqendruar veçanërisht te Strait of Hormuz, një korridor strategjik nga ku kalon rreth një e pesta e naftës botërore. Edhe pa dëme të konfirmuara ndaj infrastrukturës energjetike, vetëm rreziku i bllokimit të kësaj rruge detare ka mjaftuar për të rritur ndjeshëm çmimet dhe kostot e transportit me cisterna.

Çmimet e naftës kanë shënuar rritje të fortë, duke arritur nivelet më të larta në muajt e fundit, ndërsa kompanitë e transportit detar dhe sigurimeve po rishikojnë operacionet e tyre në rajon për shkak të rrezikut të lartë.

Ekspertët paralajmërojnë se një konflikt i zgjatur mund të shkaktojë tronditje serioze në ekonominë globale, duke ushtruar presion mbi inflacionin dhe rritjen ekonomike në shumë vende.

Tregu i energjisë mbetet në pritje të zhvillimeve të mëtejshme, ndërsa çdo sinjal për zgjerim apo zbutje të konfliktit pritet të ndikojë drejtpërdrejt në luhatjet e çmimeve në ditët në vijim./IndeksOnline/