Ministria e Mbrojtjes njofton për një arritje tjetër të FSK-së

Qendra Ndërkombëtare e Trajnimit në Kërkim-Shpëtim e FSK-së prezantohet nga Rrjeti i Njohurive për Mbrojtjen Civile të Bashkimit Evropian, ka bërë të ditur Ministria e Mbrojtjes.

“Rrjeti i Njohurive për Mbrojtjen Civile të Unionit që vepron në kuadër të Drejtorisë së Përgjithshme për Mbrojtjen Civile Evropiane dhe Operacionet e Ndihmës Humanitare të Bashkimit Evropian prezantoi Qendrën Ndërkombëtare të Trajnimit të Kërkimit dhe Shpëtimit të FSK-së në Pomozatin”, thuhet në njoftimin e Ministrisë të cilët edhe kanë treguar edhe për artikullin e publikuar për FSK-në.

“Në një artikull të titulluar ‘Ndërtimi i trajnimeve për kërkim-shpëtim në Kosovë’ ata përshkruajnë në detaje punën dhe infrastrukturën e Qendrës. Veçanërisht ata u fokusuan në vizionin ambicioz dhe të ardhmen e Qendrës Ndërkombëtare të Trajnimit në Kërkim-Shpëtim e FSK-së. Në fjalinë përfundimtare të artikullit thuhet “Nëse dëshironi një përvojë trajnimi unik, sfidues dhe tërësisht të këndshëm, vizitoni Kosovën.”

Ministria e Mbrojtjes thotë se shumë punë dhe përpjekje u bënë në procesin e prezantimit nga Rrjeti i Njohurive për Mbrojtjen Civile të Unionit dhe se rezultati është burim i madh krenarie dhe arritjesh për SARITC-në, FSK-në dhe Kosovën.