Trump vendos tarifë 100% për çipat, Apple përfiton përjashtim

Presidenti Donald Trump, gjatë një takimi në Zyrën Ovale me CEO-n e Apple, Tim Cook, njoftoi vendosjen e një tarife prej 100% për importin e çipave në Shtetet e Bashkuara.

Megjithatë, disa kompani do të përjashtohen nga kjo tarifë, duke përfshirë Apple, për shkak të investimeve të tyre në prodhimin vendas.

Në prani të presidentit Trump, Tim Cook konfirmoi se Apple do të shpenzojë 100 miliardë dollarë shtesë për të fuqizuar prodhimin lokal të teknologjisë, një zotim që përputhet me politikat e promovuara nga Trump për zhvillimin ekonomik të vendit.

Presidenti shtoi se kompanitë që bëjnë publike planet e tyre për investime në prodhimin vendas do të përjashtohen nga pagesa e tarifave për çipat.

Si pjesë e këtij plani, Apple do të investojë në një projekt të ri prodhimi në SHBA, që do të përfshijë një fabrikë me bazë në Kentucky, të drejtuar nga kompania Corning, e cila do të prodhojë xham për modelet e ardhshme të iPhone.

Corning është furnizues i xhamit për iPhone që nga lansimi i modelit të parë në vitin 2007.

Megjithatë, Apple nuk ka njoftuar ende planet për të prodhuar vetë iPhone-in në SHBA.