Vazhdon gjykimi me dyer të mbyllura i të dyshuarve për spiunazh

Në Gjykatën Themelore në Prishtinë po vazhdon mbajtja e seancës gjyqësore ndaj Bedri Shabanit dhe Muharrem Qerimit, të dyshuar për spiunazh.

Seanca po vazhdon pas ndërprerjes së shkurtër me urdhër të trupit gjykues, shkruan IndeksOnline.

I akuzuari Bedri Shabani, në fillim të seancës, kërkoi që të mos deklarohej sot për shkak të gjendjes jo të mirë shëndetësore.

Për këtë arsye edhe u shtye për disa minuta seanca, me qëllim që të kontaktohej Shërbimi Korrektues për të marrë raportin mjekësor të tij

“Gjykata menjëherë ka kontaktuar qendrën e paraburgimit në Gjilan, ku ka kërkuar sqarime rreth gjendjes shëndetësore të të akuzuarit Bedri Shabani. Menjëherë, nga doktori i kësaj qendre, kemi marrë përgjigje se i pandehuri, Bedri Shabani, më 11.11.2025 u lajmërua për konsultë të mjeku i burgut, ku edhe është vizituar, me pretendimet si në ankesën e tij. Atij i është rekomanduar terapi dhe konsulta te specialistët përkatës. Duke qenë se kjo përgjigje ishte pak e mangët, gjykata edhe një herë kontaktoi njësinë përkatëse në burg për të konfirmuar nëse ai është vizituar edhe sot te mjeku. Përgjigjja rezulton se edhe sot, Bedri Shabani u vizitua te mjeku, teksa parametrat vitale të tij janë në gjendje normale”, u shpreh gjyqtari Beqiri.

Shabani kërkoi nga trupi gjykues që në aspektin human të shtyhet seanca, pasi po ndjehet i mpirë nga terapia mjekësore.

Avokati i tij, Besnik Berisha, kërkoi se për shkak të natyrës së problemit shëndetësor të Shabanit dhe konfidencialitetit, seanca të vazhdojë pa praninë e mediave.

Një gjë e tillë u kundërshtua nga prokurori i çështjes, Bekim Kodraliu.

Por, trupi gjykues miratoi kërkesën e avokatit Berisha, vetëm sa i përket pjesës kur do të deklarohet sa i përket çështjes shëndetësore të klientit të tij.

Shabani dhe Qerimi dyshohet të kenë mbledhur dhe dërguar informacione në adresën e BIA-s serbe, lidhur me UÇK-në, Policinë e Kosovës, AKI-në dhe IPK-në./IndeksOnline/