Humb jetën tragjikisht në një aksident trafiku
Dje rreth orës 15:00, në rrugën “Shkelzen Haradinaj” në Prishtinë, ka ndodhur një aksident trafiku, ku ka humbur jetën një person.
Në këtë aksident kanë qenë të përfshira dy automjete, vetura e tipit “Golf ” dhe një autobus i tipit “Mercedes”.
Si pasojë e këtij aksidenti është lënduar ngasësi i veturës, i cili nuk ka arritur të përballonte plagët e shkaktuara nga aksidenti dhe ai, rreth orës 18:00, në QKUK, ka ndërruar jetë, bëhet fjalë për viktimën:
R. M. 27 vjeç, mashkull, shtetas kosovar ( drejtues i veturës “Golf”), vdekja e të cilit është konfirmuar nga ekipi mjekësor në QKUK.
Lidhur me këtë aksident drejtuesit të autobusit, me urdhër të prokurorit të shtetit, i është shqiptuar masa e ndalimit prej 48- orësh. Ndërkohë që trupi i viktimës është dërguar në Institutin e Mjekësisë Ligjore për obduksion.
Gjatë nëntë muajve të këtij viti, në rajonin e Prishtinës kanë ndodhur 4.826 aksidente trafiku prej tyre:
• 24 Aksidente trafiku me pasoja fatale – 25 persona
• 1.484 Aksidente trafiku me të lënduar – 2.792 persona të lënduar
• 3.318 Aksidente trafiku me dëme materiale.
Andaj, duke parë si shqetësues këtë numër të madh të aksidenteve të trafiku, veçanërisht numrin e madh të viktimave nga aksidentet fatale dhe të personave të lënduar, kërkojmë nga të gjithë pjesëmarrësit në trafik që të respektojnë me përpikëri të gjitha rregullat e kodit rrugor, në mënyrë që bashkërisht të ndikojmë në uljen e numrit të aksidenteve, uljen e vdekshmërisë në komunikacionin rrugor, e rrjedhimisht ngritjen e shkallës së sigurisë në trafik./Indeksonline/