Vendos Qeveria, hiqet ora policore për zyrtarët e angazhuar në zgjedhje

IndeksOnline, sot gjatë ditës ka raportuar se qeveria do të heqë orën policore për personat që janë të angazhuar në procesin e zgjedhjeve lokale.

Ndërkohë, që pak më parë Qeveria e Kosovës ka njoftuar se ka hequr masën e kufizimit të qarkullimit për personat që janë të angazhuar në organizim të zgjedhjeve, më 17 tetor.

Vendimi është marrë në mbledhjen e sotme të mbajtur në formë elektronike.

Sipas njoftimit të Qeverisë, kjo pikë ua mundëson lëvizjen e lirë anëtarëve të këshillave të vendvotimeve dhe vëzhguesve të procesit zgjedhor. Masa vlen nga e shtuna deri të hënën.

Aktualisht, me masat anti-COVID qytetarët nuk kanë të drejtë qarkullimi nga ora 22 e mbrëmjes deri në 5 të mëngjesit.

“Ky vendim është marrë me qëllim që t’u mundësohet kryerja e detyrës zyrtare”, thuhet në njoftim të Qeverisë.